މޯލްޑިވްސް ޑިޖިޓަލް ޕާޓްނަރްޝިޕް އެމްއޯޔޫ ގައި ސޮއިކޮށްފި
ނޭޝަނަލް ސެންޓާ ފޯ އިންފޮމޭޝަން ޓެކްނޮލޮޖީ އާއި މާސްޓާ ކާޑް އަދި ބޭންކް އޮފް މޯލްޑިވްސް އިން މޯލްޑިވްސް ޑިޖިޓަލް ޕާޓްނަރްޝިޕް އެމްއޯޔޫ ގައި ސޮއިކޮށްފި އެވެ.
މި އެއްބަސްވުމަކީ ރާއްޖެއަށް ޒަމާނީ އީޖާދުތައް ތައާރަފުކޮށް ޑިޖިޓަލް ޓެކްނޮލޮޖީތައް ބޭނުންކުރުން ހަލުވިކުރުމަށާއި އޭގެ ޒަރިއްޔާއިން ރައްޔިތުންނަށް ލުއިފަސޭހަކޮށް ހިދުމަތްތައް ދިނުމަށާއި ޑިޖިޓަލް އިކޮނޮމީ ފުޅާކުރުމުގެ ދަށުން ކޭޝްލެސްކޮށް، މުޖުތަމައުގެ އެންމެނަށް ލުއި ފަސޭހަގޮތަކަށް ވިޔަފާރީގެ އަދި އެނޫންވެސް ފައިސާގެ މުއާމަލާތްތައް ހިންގޭނެ މަގުތައް ފަހިކޮށްދިނުމުގެ މަގުސަދުގައި އެކުލަވާލި އެއްބަސްވުމެކެވެ.
މޯލްޑިވްސް ޑިޖިޓަލް ޕާޓްނަރްޝިޕް އެމްއޯޔޫ ގައި ސޮއިކުރުން --
ބޭންކް އޮފް މޯލްޑިވްސްގައި މިކަމަށްޓަކައި ބޭއްވި ރަސްމިއްޔާތުގައި މިނިސްޓްރީ އޮފް ހޯމް ލޭންޑް ސެކިއުރިޓީ އެންޑް ޓެކްނޮލޮޖީގެ ފަރާތުން ސޮއިކުރެއްވީ މިނިސްޓާ އޮފް ސްޓޭޓް ފޮރ ހޯމް ލޭންޑް ސެކިއުރިޓީ އެންޑް ޓެކްނޮލޮޖީ އަދި ނޭޝަނަލް ސެންޓާ ފޯ އިންފޮމޭޝަން ޓެކްނޮލޮޖީ (އެންސީއައިޓީ)ގެ އިސްވެރިޔާ، ޑރ. މުހައްމަދު ކިނާނަތު އެވެ. އަދި މާސްޓާ ކާޑްގެ ފަރާތުން ސޮއި ކުރެއްވީ މާސްޓާ ކާޑް އޭޝީޔާ ޕެސިފިކްގެ ސީނިއާ ވައިސް ޕްރެސިޑެންޓް ސަޕަން ޝާހް އެވެ.
ބޭންކް އޮފް މޯލްޑިވްސް އިން މި އެމްއޯޔޫ ގައި ސޮއި ކުރެއްވީ އެ ބޭންކުގެ ސީއީއޯ އަދި މެނޭޖިން ޑައިރެކްޓަރު މުހައްމަދު ޝަރީފް އެވެ.
މޯލްޑިވްސް ޑިޖިޓަލް ޕާޓްނަރްޝިޕް އެމްއޯޔޫ ގައި ސޮއިކުރުން --
ފަސް އަހަރު ދުވަހަށް ދެމިގެންދާ މި އެމްއޯޔޫގެ ދަށުން މައިގަޑު 7 ދާއިރާއިން މަސައްކަތްތަކެއް ކުރުމަށް ވަނީ އެއްބަސްވެފަ އެވެ.
މީގެ ތެރޭގައި ހިމެނޭ އެއް ކަމަކީ އެންސީއައިޓީ އިން ތަރައްގީކޮށް ބަލަހައްޓަމުންދާ ރާއްޖޭގެ ގައުމީ ޑިޖިޓަލް އައިޑީ ގެ ނިޒާމް ކަމަށްވާ އީފާސް އާއި ސްމާޓް އައިޑީގެ ތެރެއިން އިލެކްޓްރޯނިކްކޮށް ނުވަތަ ޑިޖިޓަލްކޮށް ފައިސާގެ މުއާމަލާތްތައް ހިންގޭނެ ހަރުދަނާ ސިސްޓަމްތަކެއް ގާއިމްކުރުން ހިމެނެ އެވެ.
އަދި ސައިބާ ސެކިއުރިޓީ ވަރުގަދަކޮށް، ޑިޖިޓަލް ޕޭމަންޓް ސިސްޓަމްތައް އިތުރަށް ހަރުދަނާކޮށް މުއާމަލާތްތަކުގެ ރައްކާތެރިކަން އިތުރަށް ކަށަވަރުކޮށް އޭގެ ސަބަބުން ސްކޭމްތަކާއި އެނޫންވެސް މަކަރާއި ހީލަތުން ހިންގާ މުއާމަލާތްތައް މަދުކުރުން ވެސް ހިމެނެ އެވެ. މީގެ އިތުރުން މާސްޓާ ކާޑްގެ ފަންނީ ތަޖުރިބާ ހިއްސާކޮށް އޭގެ އެހީގައި ރާއްޖެއަށް ކުރިއެރުން ހާސިލްކުރެވޭނެ ގޮތްތައް ހޯދައި މި ތިން މުއައްސަސާއިން ގުޅިގެން މަސައްކަތް ކުރެވޭނެމަގު މި އެމްއޯޔޫ މެދުވެރިކޮށް ހުޅުވިގެންދާނެ އެވެ.
Advertisement
This content is created and paid for by advertisers and does not involve Voice Journalists
