ޣައްޒާގެ ރައްޔިތުންގެ ހައްޤުގައި މާދަމާ ހަވީރު ރާއްޖޭގެ އެކި ކަންކޮޅުތަކުގައި ޤައުމީ ފެންވަރުގެ ބޮޑު އެއްވުމެއް ބޭއްވުމަށް ނިންމައިފިއެވެ.

ސުލްހައަށް މަސައްކަތްކުރާ ބައިނަލްއަޤްވާމީ އެކްޓިވިސްޓުންގެ ޖަމާއަތެއްކަމަށްވާ "ގްލޯބަލް ސުމޫދް ފްލޮޓިއްލާ" ހަރަކާތުގެ ދަށުން ކުރިއަށްގެންދިއުމަށް ހަމަޖެހިފައިވާ މި އެއްވުން އިންތިޒާމްކުރަނީ، އިންޓަރނޭޝަނަލް އެއިޑް ކެމްޕެއިން، އައިއޭސީ އިސްވެ އޮވެ، ރާއްޖޭގެ މަދަނީ ޖަމިއްޔާ ޖަމާއަތްތަކާއި، މުއައްސަސާތަކާއި، ކުންފުނިތަކުގެ އިތުރުން އާއްމުން ބައިވެރިވާ ހާއްސަ ސްޓިރިއަރިން ކޮމިޓީއަކުންނެވެ.

ދިވެހިރާއްޖޭގެ ޤައުމީ ރޭޑިއޯ ހިންގާ އިމާރާތުގެ ސެނެކޯ މާލަމުގައި ބޭއްވި ނޫސްވެރިންގެ ބައްދަލުވުމުގައި މި ބޮޑު އެއްވުމާ ބެހޭގޮތުން ޓިއަރިން ކޮމިޓީގެ ފަރާތުން ވާހަކަދެއްކެވި ބޭފުޅުން ބުނެފައިވަނީ، މާދަމާ ހަވީރު 4 ޖަހާއިރު ރާއްޖޭގެ އެކި ކަންކޮޅުތަކުގައި ފެށުމަށް ހަމަޖެހިފައިވާ މި އެއްވުމަކީ ސުލްހަވެރި އަދި ޣައްޒާގެ އެންމެފަހުގެ ހާލަތު ރައްޔިތުންނަށް ސާފުކޮށްދީ ޣައްޒާގެ ރައްޔިތުންނާއެކު ދިވެހިން ތިބިކަން އަންގައިދިނުމުގެ ގޮތުން ބާއްވާ ހަރަކާތެއް ކަމަށެވެ.

ޤައުމީ ބޮޑު އެއްވުމުގެ ޕޯސްޓަރެއް

މި ހަރަކާތުގައި ޔަހޫދީން ސިފައިން ޣައްޒާގެ މުސްލިމުންނަށް ދެމުންދާ ލާއިންސާނީ އަމަލުތައް ކުށްވެރިކޮށް އެކަމާ ދެކޮޅަށް އަޑުއުފުލައި ރައްޔިތުންގެ ޝުއޫރުތައް ފާޅުކުރުން އޮންނާނޭކަމަށް އެބޭފުޅުން ފާހަގަކުރެއްވިއެވެ. ކޮމިޓީގެ ބޭފުޅުން ވަނީ ޣައްޒާގެ ރައްޔިތުންގެ މިނިވަންކަމުގެ ހައްޤުގައި ބޭއްވުމަށް ހަމަޖެހިފައިވާ ސުލްހަވެރި މި އެއްވުމުގައި ވީހާވެސް ގިނަ ފަރާތްތަކަކުން ބައިވެރިވެ، މިކަމުގައި ދިވެހިންގެ އެއްބައިވަންތަކަން ދެއްކުމަށް އެދިފައެވެ.

މި ހަރަކާތް އެއްވަގުތެއްގައި ރާއްޖޭގެ މީހުން ދިރިއުޅެމުންދާ 50 ހަށްވުރެ ގިނަ ރަށުގައި ކުރިއަށްގެންދިއުމަށް ވަނީ ނިންމާފައެވެ. ހަރަކާތް މާލޭގައި ފެށުމަށް ހަމަޖެހިފައިވަނީ މާފަންނު ސްޓޭޑިއަމްގައެވެ.

އިސްރާއީލްގެ އިސްތިޢުމާރީ ސިފައިން ޢައްޒާ ހިސޯރުކޮށް އިންސާނިއްޔަތާ ހިލާފަށް ހިންގަމުންގެންދާ ޖަރީމާތަކާ ދެކޮޅަށް ބައިނަލްއަޤްވާމީ 44 ޤައުމެއް ގުޅިގެން ފަށާފައިވާ "ގްލޯބަލް ސުމޫދް ފްލޮޓިއްލާ" ހަރަކާތުގެ ދަށުން ދިވެހިރާއްޖޭގައި މީގެ ކުރިންވެސް ބައެއް ހަރަކާތްތައް ވަނީ ކުރިއަށްގެންގޮސްފައެވެ. މީގެ ތެރޭގައި މިފަހުން މޫދު އަޑީގައި ޑައިވަރުން ހިންގި ހަރަކާތް ފާހަގަކޮށްލެވެއެވެ.