ރައީސުލްޖިމްހޫރިއްޔާ ޑރ.މުހައްމަދު މުއިއްޒު، އިންޑިއާގެ މިނިވަންދުވަހުގެ މުނާސަބަތުގައި ތަހުނިޔާ ފޮނުއްވައިފިއެވެ.
ރައީސުލްޖުމްހޫރިއްޔާ އެކްސްގައި ކުރެއްވި ޕޯސްޓްގައި ވަނީ މިއަދު ފާހަގަކުރަމުންދާ އިންޑިއާގެ 78 ވަނަ މިނިވަންދުވަހުގެ ތަހުނިޔާ އެޤައުމުގެ ރައީސް ދްރޫޕަދީ މުރުމޫ އަށާއި، ބޮޑުވަޒީރު ނަރެންދުރަ މޯދީގެ އިތުރުން އިންޑިޔާގެ ރައްޔިތުންނަށް ތަހުނިޔާ ދަންނަވާފައެވެ.
ރައީސްގެ ޕޯސްޓްގައި ވިދާޅުވީ މިނިވަންދުވަހުގެ ޖޯޝާ ފޯރި، މިހާރު ކުރިއަށްދާ މިނިވަންދުވަހާ ގުޅޭ ހަރަކާތްތަކާއެކު އާލާވެގެން ދިއުން އެދޭކަމަށެވެ. އަދި ހަމަ އެހެންމެ އަވައްޓެރި އިންޑިއާ އަކީ އިތުބާރުހިފޭ ދިވެހިންގެ ތަރައްޤީގެ ބައިވެރިއެއްކަމަށް ރައީސްގެ ޕޯސްޓްގައި ވިދާޅުވިއެވެ. އަދި ރާއްޖެ އާއި އިންޑިއާ އާ ދެޤައުމުގެ ދެމެދު އެކިފަންތީގައި ކުރިއަރަމުންދާ ގުޅުންތަކުގެ މުހިއްމުކަން ރައީސްގެ ޕޯސްޓްގައި ވަނީ ފާހަގަކުރައްވާފައެވެ.
އިންޑިއާ އަކީ ރާއްޖެއާ އެންމެ އަވައްޓެރި އެއް ޤައުމެވެ. އިންޑިއާގެ މިނިވަންދުވަހުގެ ގޮތުގައި ފާހަގަކުރަނީ އިނގިރޭސިންގެ އިސްތިއުމާރީ ބާރުތަކުގެ ކިބައިން އެޤައުމަށް ފުރިހަމަ މިނިވަންކަން ލިބުނު ދުވަހެވެ. އެއީ 1947 ވަނަ އަހަރުގެ އޮގަސްޓްމަހުގެ 15 ވަނަ ދުވަހެވެ.
އިންޑިއާއަށް މިނިވަންކަން ލިބުމުގެ އެތައް އަހަރެއް ކުރިންވެސް، އެޤައުމަކީ ރާއްޖެއާ އެކި ގޮތްގޮތުން ގުޅުން އޮތް ޤައުމެކެވެ.
Advertisement
This content is created and paid for by advertisers and does not involve Voice Journalists
