ދަރިފުޅާ ގުޅޭ ވާހަކަތައް ޝަހީމް ދޮގުކުރައްވައިފި، ގައިގަ ބަނދެން ވޭޕް އެތެރެއެއް ނުކުރޭ
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދުގެ ދޮށީ ދަރިފުޅު އަބްދުالله މާހިލް ޝަހީމްއާ ގުޅޭގޮތުން ފަތުރަމުންދާ ވާހަކަތައް ޝަހީމް ދޮގުކުރައްވައިފި އެވެ.
ޝަހީމްގެ ދަރިފުޅު މާހިލް, ރޭ ވަނީ މެލޭޝިޔާ އިން އައިސްފަ އެވެ. އޭނާ ހުއްޓުވާ ބަލާ ފާސްކުރިއިރު ގައިގައި ބަނދެގެން ވޭޕްގެ ސާމާނު އެތެރެކުރި ކަމަށް ބުނެ ނޫސްތަކުގައި ވަނީ ރިޕޯޓް ކޮށްފަ އެވެ. އެތަކެތި އެތެރެކުރީ ގައިގައި ބަނދެގެންނާއި ލަގެޖްގައި ކަމަށް ވެސް ބުންޏެވެ.
ރިޕޯޓްތައް ބުނާގޮތުން 118 ވޭޕް ސްޓިކް މާހިލް އެތެރެކުރަން އުޅުނެވެ. އަދި މިލިއަނަކަށް ވުރެ ގިނަ ރުފިޔާ އިން އޭނާ ވަނީ ޖޫރިމަނާ ކޮށްފަ އެވެ.
އެ ވާހަކަތަކާއި ގުޅޭގޮތުން މިނިސްޓަރު ޝަހީމް ވަނީ އެކްސްގައި ޕޯސްޓެއް ކުރައްވާފަ އެވެ. ވިދާޅުވީ ގައިގައި ބަނދެގެން ވޭޕް ސާމާނުތަކެއް އެތެރެކުރި ކަމަށް ބުނެ ހަގީގަތާއި ހިލާފު ވާހަކަތަކެއް ފެތުރުމަކީ ވަރަށް ދެރަ ކަމެއް ކަމަށެވެ. އަދި އޭނާގެ ދަރިފުޅު މާހިލް އަކީ މެލޭޝިޔާގެ އެމްބަސީގައި ވަޒީފާގައި ހުރި މީހެއް ނޫން ކަަމަށްވެސް ވިދާޅުވި އެވެ.
"ހަބަރުތައް ރަނގަޅު ކުރުން އެދެން," ގޯސްކޮށް ލިޔެފައިވާ ހަބަރުތައް އިސްލާހު ކުރުމަށް އެދި މިނިސްޓަރު ޝަހީމް ލިޔުއްވާފައިވެ އެވެ.
މިނިސްޓަރު ޝަހީމް ދޮގުކުރި ރިޕޯޓްގައި ބުނާ ގޮތުން މާހިލް ހުރީ އެމްބަސީގެ ވަޒީފާއެއްގަ އެވެ. މުސާރައާ އެލަވަންސްތަކާއެކު ލައްކައެއްހާ ރުފިޔާ ލިބޭ ކަަމަށެވެ. ނަމަވެސް މިނިސްޓަރު ޝަހީމް ކުރީން ވެސް ވަނީ އެ ވާހަކަ ދޮގު ކުރައްވާފަ އެވެ.
Advertisement
This content is created and paid for by advertisers and does not involve Voice Journalists
