ފަލަސްތީނުގެ ރައްޔިތެއްކަމަށްވާ މަންސޫރު ޝޫމަން، ޣައްޒާގައި ތަޖުރިބާކުރި ހިތްދަތި ތަޖުރިބާގެ ވާހަކަ ދިވެހިންނާ ހިއްސާކުރުމުގެ ގޮތުން އަލް އަސްރް ޖަމިއްޔާއިން ހުޅުމާލެ ރުއްގަނޑު ދޭއް ސަރަހައްދުގައި ހާއްސަ އިވެންޓެއް ބޭއްވުމަށް ނިންމައިފިއެވެ.

މި އިވެންޓް ބޭއްވުމަށް ނިންމާފައިވަނީ މާދަމާ ރޭ 20:30 ގައި ހުޅުމާލޭ ދެވަނަ ފިޔަވަހީ ރުއްގަނޑު ދޭއް ސަރަހައްދުގައެވެ. އަލް ޢަސްރުގެ ޔެޕް ޕްރޮގްރާމުގެ ތެރޭގައި ހިމެނިގެން ކުރިއަށްގެންދިއުމަށް ހަމަޖެހިފައިވާ މި އިވެންޓްގައި ޣައްޒާގައި މަންސޫރު ތަޖުރިބާކުރި ހިތްދަތި ދިރިއުޅުުގެ ވާހަކަ އާއި މިހާރު ޢައްޒާގެ ހާލަތު ކިޔައިދޭނެއެވެ.

މިއީ ޢައްޒާގެ ހިތްދަތި ދިރިއުޅުން ތަޖުރިބާކުރި ފަލަސްތީނުގެ ރައްޔިތެއްގެ ވާހަކަ ދިވެހިން ގާތަށްއައިސް ހިއްސާކުރާ ފުރަތަމަ ފަހަރުކަން ފާހަގަކޮށްލެވެއެވެ.

މަންސޫރު ވަނީ މީގެ ކުރިން ޤައުމީ ބޮޑު އެއްވުމުގައިވެސް ޣައްޒާގައި އޭނާ ތަޖުރިބާކުރި ހިތްދަތި ދިރިއުޅޫމުގެ ވާހަކަ ކޮންމެވެސް ވަރަކަށް ހިއްސާކޮށްފައެވެ. އިސްރާއީލްގެ ސިފައިން ހިސޯރުކޮށްފައިވާ ޢައްޒާ ސިޓީގައި މަންސޫރު ވަނީ 6 މަސްދުވަހު ވަރަށް ހިތްދަތި ދިރިއުޅުމެއް ވޭތިކޮށްފައެވެ.

އަލް އަސްރު ޖަމިއްޔާއިން މަންސޫރުގެ ވާހަކަ މި ގެނެސްދެނީ އިންޓަރނޭޝަނަލް އެއިޑް ކެމްޕެއިން، އައިއޭސީގެ އެއްބާރުލުމާ އެކުގައެވެ. މަންސޫރު ރާއްޖެ އައިސްފައިވަނީ، ޣައްޒާގެ ރައްޔިތުން ހިސޯރުކުރުމާ ދެކޮޅަށް ދިވެހިން ބޭއްވި ޤައުމީ ބޮޑު އެއްވުމުގައި ބައިވެރިވާށެވެ.