މާލޭ ސަރަހައްދު މަސްމާރުކޭޓާ ދިމާލު ތޮށިމަތީގައި ބިދޭސީންތަކެއް މަޑި ތަކެއް ބާނާ މަންޒަރު ފެންނަ ވީޑިއޯއަކާ ގުޅިގެން ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ކަންބޮޑުވުން ފާޅުކޮށްފިއެވެ.
އެ ޕޯސްޓުގައި މެންބަރު ކުޑޫ ވިދާޅުވީ ބިދޭސީން މިފަދަ ޤާނޫނާ ޚިލާފު ޢަމަލުތައް ހިންގުމަށް ޖެހިލުންނުވާ ސަބަބަކީ އެފަދަ ކަންކަމުގައި އެކަށީގެންވާ ފިޔަވަޅު ނޭޅި ޤާނޫނީ ޒިންމާއިން ރެކެވޭނެ ފުރުޞަތު އޮތުމެވެ. ހަމައެއާއެކު ރާއްޖޭގެ ރައްޔިތުން ވެސް ޤާނޫނާއި ޤަވާޢިދުތަކަށް ޙުރުމަތްތެރިކޮށް ނުހިތާ މަންޒަރު ފެނުމަކީ މިކަމަށް ލިބޭ ހިތްވަރެއް ކަމަށް ޕޯސްޓްގައި އޭނާ ވިދާޅުވިއެވެ.
މި ޕޯސްޓްގައި ކުޑޫ ވިދާޅުވެފައިވަނީ ދުނިޔޭގެ އެހެން ޤައުމުތަކުގައި ބިދޭސީ މަސައްކަތްތެރިން ޤާނޫނުތަކަށް ފުރިހަމައަށް ބޯލަނބާ ސަބަބަކީ އެ ޤައުމުތަކުގައި ޤާނޫނު ތަންފީޒުކުރުމުގެ ހަރުދަނާ އަދި ހަރުކަށި އުޞޫލުތައް ޤާއިމްކުރުން ކަމަށެވެ.
މަޑީގެ ހުރިހާ ބާވަތަކީވެސް ރާއްޖޭގެ ކަނޑުގެ ދިރުންތަކުގެ ތެރެއިން ޙިމާޔަތްކޮށްފައިވާ މަސްމަހާމެހީގެ ބާވަތެކެވެ. އެއްވެސް ބާވަތެއްގެ މަޑިއެއް ރާއްޖޭގެ އެއްވެސް ސަރަހައްދަކުން ހިފުމަކީ ޤާނޫނީގޮތުން މަނާކަމެކެވެ. މީގެ އިތުރުން މަޑިތަކަށް ގޯނާކުރުމާއި އެތަކެތީގެ ގުދުރަތީ ބާވަތްތަކާއި ދިރިއުޅޭ މާހައުލަށް ގެއްލުންދިނުމަކީވެސް މަނާކޮށްފައި އޮންނަ ކަމެކެވެ.
Advertisement
This content is created and paid for by advertisers and does not involve Voice Journalists
