ރަށު ޓޫރިޒަމް ހިންގާއިރު އިންތަކުގައި ހިފެހެއްޓުމަށާއި ހުއްދަ ނޫން ގޮތްގޮތުން ފައިސާ ނުހޯދުމަށް އެ ވިޔަފާރީގައި ހަރަކާތްތެރިވާ އެންމެހާ ވިޔަފާރިވެރީންނަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ގޮވާލައްވައިފި އެވެ.

އެމަނިކުފާނު އެކަމަށް ގޮވާލެއްވީ އއ. އުކުޅަހުގައި ވާހަކަފުޅު ދައްކަވަމުންނެވެ. އއ އަތޮޅަށް އިއްޔެ ފެއްޓެވި ދަތުރުފުޅުގައި ފަހު މަންޒިލެއްގެ ގޮުތުގައި އެ ރަށަށް ވަޑައިގެން ވާހަކަ ދައްކަވަމުން ރައީސް ވިދާޅުވީ ގެސްޓްހައުސް ހިންގާ ރަށްރަށުގައި ނޭދެވޭ ކަންކަން ހިނގަމުންދާތީ ރައްޔިތުންގެ ޝަކުވާ ލިބިވަޑައިގަންނަވާ ކަމަށެވެ.

ބީޗަށް ދާއިރު ނިވާކަން ކުޑަ ހެދުންލައިގެން ފަތުރުވެރީން އުޅޭ މައްސަލައާ ރަށުތެރޭގައިވެސް އެގޮތަށް އުޅޭ މައްސަލާގައި ކަންބޮޑުވެ ކުޑަކުދީންގެ ފަރާތުން ނޯޓެއް ލިބިފައިވާ ކަން ފާހަގަ ކުރައްވާ ރައީސް ވިދާޅުވީ ގެސްޓްހައުސްތައް ހިންގަނީ ރިސޯޓްތަކުގައި ނޫން ކަަމަށާ އެހެން ކަމުން ވިސްނަން ޖެހޭ ކަންކަން ހުންނާނެ ކަމަށެވެ.

އަދި ދިވެހީންގެ ގަބޫލުކުުރުންތަކާއި އަގީދާއާ ހިލާފު ކަންކަން ހިންގުމުގެ ފުރުސަތު ދީގެން ނުވާނެ ކަމަށް ވިދާޅުވި އެވެ. ރައީސް ވިދާޅުވީ ރިސޯޓްތަކާއި ސަފާރީތަކުގައި ކުރާ ކަންކަން ރަށްރަށުގައި ނުކުރެވޭނެ ކަމަަށެވެ. އަދި މުއްސަދިކަން ހޯދުމަށްްޓަކާއި ވެސް ކޮށްގެން ނުވާނެ ކަން ހުންނާނެ ކަމަށް ވިދާޅުވެ ރަށު ޓޫރިޒަމް ހިންގާއިރު އިންތައް ހިފަހައްޓަން ޖެހޭނެ ކަމަށް ވިދާޅުވި އެވެ.

"އަޅުގަނޑުމެންގެ އަޤީދާ އަޅުގަނޑުމެން މާތްވެގެންވާ އިސްލާމްދީން ބުނެދޭ ހަމަތަކުގެ މަތީން މުއްސަދިކަން ހޯދަން މަސައްކަތް ކުރީމަ މާތްﷲ سبحانه و تعالى އެކަމުގައި ބަރަކާތް ލައްވާނެ," ރައީސް ވިދާޅުވި އެވެ.

ރައީސް މުއިއްޒު އުކުޅަހު ރައްޔިތުންނާއި ބައްދަލު ކުރެއްވުން 

ރައީސް ވިދާޅުވީ ގާނޫނުގައި ހުންނަ ކުދިކުދި ލޫޕްހޯލްތައް ބޭނުންކޮށްގެން މި ވިޔަފާރީގައި ބައެއް ފަހަރު ގޯސްތައް ހަދަމުންދާ ކަމަށެވެ. އެ ގޮތުން ގެސްޓްހައުސްތަކަށް އަންނަ ފަތުރުވެރީންނަށް ރަށުގެ ކައިރީގައި ސަފާރީއެއް ބާއްވައިގެން ގެންގޮސް ރާ ދީ ހަދާ ކަަމަށް ވިދާޅުވި އެވެ.

"ކާކަށްތޯ އޮޅުވާލަން މަސައްކަތް މި ކުރަނީ. ހަމަ ޔަގީނުންވެސް ވެރިއިހާލު މޮޅަށް ދެނެވޮޑިގެންވޭ ހުރިހާ ކަމެއް. އަޅުގަނޑުމެން ކޮން މުއްސަދިކަމެއްތޯ މި ހޯދަނީ އެކަލާންގެ ނުރުއްސަވާ މަގަކުން. ކޮން ބަރަކާތެއްތޯ އެކަމުގައި އޮންނާނީ. ކޮން ޝޯޓް ކަޓެއްތޯ ނަގަން މަސައްކަތް މި ކުރަނީ. މިވަގުތު ކަމެއް ނޭންގެ އަޅުގަނޑުމެން މި ދުނިޔެ ދޫކުރާނީ. މާދަމާ މިކަން އިސްލާހު ކުރާނެ ވަގުތު އޮންނާނެތޯ,"

ރައީސް ވަނީ އަމިއްލަ ނަފްދަށް އިހްލާސްތެރި ގާނޫނީ އިމުގެ ތެރޭގައި ވިޔަފާރީގެ ހުރިހާ ކަމެއް ވެސް ކުރުމަށް އިލްތިމާސް ކުރައްވާފަ އެވެ. އަދި ދިވެހީންނަކީ މުސްލިމުންކަން އަބަދުވެސް ހަނދާން ކުރާން ޖެހޭ ކަމަށް ވިދާޅުވި އެވެ. އެމަނިކުފާނު ވިދާޅުވީ ދުނިޔެ އަކީ ކުޑަހިނދުކޮޅަކު ތިބޭ މަންޒިލެއް ކަމުން ދާންވީ މަންޒިލް ކަށަވަރު ނުކުރާނަމަ އެއަށް ވުރެ މޮޔަ ބަޔަކު ނުތިބޭނެ ކަމަށެވެ.

އެހެން ކަމުން މުއްސަދިކަން ހޯދާނަމަ ރަނގަޅު ގޮތުގައި ހޯދޭތޯ ޔަގީން ކުރަންޖެހޭ ކަމަށް ވިދާޅުވި އެވެ.