ބޭންކް އޮފް މޯލްޑިވްސް އިން އއ އުކުޅަހުގައި އެ ބޭންކުގެ ބްރާންޗެއް ގާއިމްކޮށް ޑޮލަރު އޭޓީއެމެއް ބަހައްޓައި ހިދުމަތްދޭން ފަށައިފިއެވެ.

ބީއެމްއެލުން އުކުލަހުގައި ގާއިމްކުރި އެ ބޭންކުގެ ހިދުމަތް ފަށާފައިވަނީ މިއަދު ރައީސުލްޖުމްހޫރިއްޔާ އެރަށަށް ކުރެއްވި ޒިޔާރަތުގެ ތެރެއިންނެވެ. ހިދުމަތް ފައްޓަވައިދެއްވީ ރައީސް ޑރ.މުހައްމަދު މުއިއްޒެވެ. ރައީސްއާއެކު ކެބިނެޓް މިނިސްޓަރުންނާއި ބޭންކުގެ ޗެއާޕަރސަން އަޙްމަދު ޢަލީ ޙަބީބު، ސީއީއޯ އެންޑް މެނޭޖިންގ ޑިރެކްޓަރ މުޙައްމަދު ޝަރީފް އަދި ބޭންކުގެ ބޯޑު ޑިރެކްޓަރުންނާއި އިސް ވެރިން ބައިވެރިވެވަޑައިގެންނެވިއެވެ.

އުކުޅަހަކީ ފަތުރުވެރިކަމުގެ ސިނށއަތުގައި ހިމެނޭ ކުރިއަރަމުން އަންނަ ގެސްޓްހައުސް ވިޔަފާރީގައި މަޝްހޫރު އަދިހަމައެހެންމެ އަރިއަތޮޅު އުތުރުބުރީގެ މުހިންމު އިގްތިސާދީ މަރުކަޒެކެވެ. ބީއެމްއެލުން ބުނީ އުކުޅަހުގައި ގާއިމްކުރި އައު ބްރާންޗްގެ ޚިދުމަތް ދެމުން ގެންދާނީ ބޭންކުގެ "އިސްލާމިކް ފައިނޭންސް ފަސްޓް" ޕޮލިސީގެ ދަށުން އިސްލާމިކް ބޭންކިންގ ޚިދުމަތްތަކަށް އިސްކަންދީގެން ކަމަށެވެ.

ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވިދާޅުވީ އުކުޅަހުގެ މުޖުތަމައަށް ބީއެމްއެލްގެ ޚިދުމަތްތައް އިތުރަށް ފުޅާކުރެވުމަކީ ލިބިގެންދާ ވަރަށް ބޮޑު އުފަލެއް ކަމަށާއި، އަލަށް ގާއިމްކުރެވުނު ބްރާންޗާއި އޭޓީއެމްގެ ޒަރީއާއިން އުކުޅަހާއި ކައިރި ރަށްރަށުގެ ރައްޔިތުންނާއި ވިޔަފާރިވެރިންގެ ތަރައްގީއަށް އެހީތެރިވެ، އިގްތިސާދީ ކުރިއެރުމަށް މަގުފަހިކޮށްދޭނެ މާލީ ހައްލުތައް ފަސޭހަކަމާއެކު ލިބިގެންދާނޭކަމަށެވެ.

އުކުޅަހުގައި ގާއިމްކުރެވިެގންދިޔަ ބީއެމްއެލްގެ ބޭންކިން ހިދުމަތްތަކާއެކުޗމުޅި ރާއްޖެ ހިމެނޭ ބޭންކިންގ ވިއުގަޔަކާއެކު 20 އަތޮޅުގައި 42 ބްރާންޗް، 144 ސެލްފްސަރވިސް ބޭންކިންގ ސެންޓަރ، 202 އޭޓީއެމް ބަހައްޓައި ހިދުމަތް ދެމުންދާކަމަށް ބީއެމްއެލުން ބުންޏެވެ. 

ބީއެމްއެލުން ވަނީ އއ ތޮއްޑޫގައިވެސް ޑޮލަރު އޭޓީއެމެއް ބަހައްޓާފައެވެ. އެރަށުގައި އެ ބޭންކުގެ ގޮތްޕެއްވެސް ހަދަމުން އަންނަކަން ފާހަގަކޮށްލެވެއެވެ.