ތަރައްޤީ ގެންނަން ޖެހޭނީ ދިވެހި ވަންތަކަމާއި، ރަށްވެހިކަމުގެ ވައްތަފާޅި ނުގެއްލޭ ގޮތަށްކަމަށް މިނިސްޓަރ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް އާދަން ޝަރީފް އުމަރު ވިދާޅުވެއްޖެއެވެ.

މިއަދު ފާހަގަކުރަމުންދާ ދިވެހިރާއްޖޭގެ ގައުމީ ދުވަހުގެ މުނާސަބަތުގައި ވަޒީރު އާދަން ޝަރީފް އާއްމުކުރެއްވި މެސެޖެއްގައި ވިދާޅުވެފައިވަނީ، ދިވެހިންގެ ދިވެހިވަންތަކަން ރައްކާތެރިކޮށް، ރަށްވެހިކަމުގެ ވައްޓަފާޅި ނުގެއްލޭނެގޮތަކަށް ރަށުގެ ތަރައްޤީގެ ވިސްނުމާއި އުމްރާނީ ތަރައްޤީގެ މަފުހޫމް އިސްކުރުމަކީ ކޮންމެ ދިވެއްސަކު ވިސްނަންޖެހިފައިވާ ކަމެއްކަމަށެވެ.

މި މެސެޖްގައި ވަޒީރު ވިދާޅުވެފައިވަނީ، ދިވެހިންނަށް ލިބިފައިމިވާ ނޫވިލުތަކާއި ޗާލު މޫދާއި ދޮންވެލި ގޮނޑުދޮށާއި ރަށުގެ ވެލި މަގުތަކަކީ ދިވެހިންގެ ދިވެހިވަންތަކަން ރަމްޒުކޮށްދޭ ބަހާތައް ކަމަށެވެ. އެގޮތުން އެ ބަހާތަކަށް ޤުދުރްތީގޮތުން ލިބިފައިވާ ރީތިކަން، އެގޮތުގައި ދެމެހެއްޓުމަށް ސަމާލުވާންޖެހޭކަމަށް ވަޒީރު ވިދާޅުވިއެވެ.

ރަށްރަށުގެ ތަރައްޤީ ގެނައުމުގައި ގައުމިއްޔަތަށް އިސްކަންދީގެން ކަންކަން ކުރަންޖެހޭކަމަށް ވަޒީރު ވިދާޅުވިއިރު، ޒަމާނަށް އަންނަ ތަރައްޤީއާއެކު ދިވެހިންގެ ދިވެހިވަންތަކަމާއި ދިވެހިންގެ ޒަމާންތަކަކަށް ދެމިގެންއައި ދިވެހިންގެ ވެއްޓަށް މިއަދު ބޮޑެތި ބަދަލުތަކެއް ވަނީ އައިސްފައެވެ. އެގޮތުން ދިރިއުޅުމުގެ ފަސޭހައަށް ރަށްރަށުގެ އުމްރާނީ ތަރައްޤީއަށް ގެންނަން ފެށި ތަރައްޤީގެ މަޝްރޫޢުތަކާއެކު ރަށްރަށުގެ މަލަމައްޗާއި، އެރަށްރަށުގެ ވެއްޓަށް ބޮޑެތި ބަދަލުތަކެއް އައިސްފައިވާކަމަށް ގިނަ ބަޔަކު ފާހަގަކުރެއެވެ.