ގެދޮރުވެރިޔާ ސްކީމްގެ ދަށުން ދޫކުރުމަށް ނިންމާފައިވާ 4،000 އެޕާޓްމަންޓްގެ ތެރެއިން 1،826 ތަނުގެ އެއްބަސްވުމުގައި ސޮއިކުރެވިފައިވާކަމަށް ފަހިދިރިއުޅުން ކޯޕަރޭޝަނުން ބުނެފިއެވެ.

އެޕާޓްމަންޓްތަކުގެ އެއްބަސްވުމުގައި ސޮއިކުރުމުގެ އެންމެފަހުގެ މައުލޫމާތު ހިއްސާކުރަމުން އެފްޑީސީން ބުނީ، މިހާތަނަށް އެންމެގިނައިން ސޮއިކުރެވުނީ، ގެދޮރުވެރިޔާ ސްކީމުގައި ހިމެނޭ އުދަރެސް ޓަވަރުގެ އެޕާޓްމަންޓްތަކުގެ އެއްބަސްވުމުގައިކަމަށެވެ. އެގޮތުން އުދަރެހަށް ނިސްބަތްވާ 984 އެޕާޓްމަންޓެއްގެ ވެރިފަރާތާއެކު ސޮއިކޮށް ނިމިފައިވާކަމަށް އެފްޑީސީން ފާހަގަ ކުރިއެވެ. އަދި ސޮއިނުކޮށް 1،016 އެޕާޓްމަންޓް ހުރިކަމަށް އެފްޑީސީން ބުންޏެވެ. އުދަރެސް ޓަވަރުތަކުގައި ހިމެނެނީ 2،000 އެޕާޓްމަންޓެވެ. 

ދޯދި ޓަވަރުތަކުގައި ހިމެނޭ 842 އެޕާޓްމަންޓެއްގެ އެއްބަސްވުމުގައި ސޮއިކޮށް ނިމިފައިވާއިރު، ސޮއިނުކުރާ އެޕާޓްމަންޓްގެ އަދަދަކީ، 1158 އެވެ.

އެޕާޓްމަންޓް އެއްބަސްވުންތަކުގައި ސޮއިކުރުމުގެ ކަންކަން ކުރިއަށްގެންދަނީ، ހައުސިން މިނިސްޓްރީން ފޯމުތައް ވެރިފައިކުރުމަށްފަހު ދޭ ތަރުތީބުންނެވެ. ހައުސިން މިނިސްޓްރީން އެމީހެއްގެ ނަން އެފްޑީސީއަށް ފޮނުވުމުން ގެދޮރުވެރިޔާ ޕޯޓަލުން އެ މައުލޫމާތު އަޕްޑޭޓްވިކަމަށް އެމީހެއްގެ ފޯނަށް މެސެޖެއް ފޮނުވާއިރު، އެއްބަސްވުމުގައި ސޮއިކުރަންޖެހޭ ފަރާތްތަކަށް އެކަން އަންގަނީ، އެފްޑީސީގެ "ފަހި ޕޯޓަލަށް ލޮގިންވުމަށް އަންގާ ޓެކްސްޓް މެސެޖަކުންނެވެ.

އެފްޑީސީ ޕޯޓަލަށް އަޕްލޯޑްކުރަންޖެހޭ ލިޔުންތަކުގެ ތެރޭގައި ފްލެޓް ލިބޭމީހުންގެ އައިޑީކާޑާއި، ހެކިވެރިޔާ އައިޑީކާޑްގެ އިތުރުން ބަދަލުގައި ސޮއިކުރަން މީހަކު ފޮނުވާނަމަ އެމީހެއްގެ މައުލޫމާތު ހިމެނެއެވެ.

އެފްޑީސީއިން ތަރައްޤީކުރަމުންދާ 4000 ސޯޝަލް ހައުސިންގ ޔުނިޓް މަޝްރޫޢުގައި 16 ޓަވަރު ހިމެނޭއިރު، 96 އިންސައްތަ މަސައްކަތް ނިމިފައިވާކަމަށް އެކުންފުނިން ބުނެއެވެ. އެފްޑިސީން ބުނީ އެޕާޓްމަންޓްތައް ހަވާލުކުރުމަށް ހަމަޖެހިފައިވަނީ ފިނިޝިންގ މަސައްކަތްތައް ނިންމާފައިކަމަށެވެ. އަދި އަމާޒަކީ ސެޕްޓެމްބަރުމަހުގެ ނިޔަލަށް ހުރިހާ އެޕާޓްމަންޓްތައް ހަވާލުކޮށް ނިންމާލުންކަމަށްވެސް އެޗްޑީއެފްސީން ބުނެއެވެ.