ހުސްވި ޖުލައިމަސް ނިމުނުއިރު، ދައުލަތުގެ ބެލުމުގެ ދަށުގައި 152 ކުއްޖަކު ތިބިކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ބުނެފިއެވެ.

އެ ވުޒާރާއިން އާއްމުކުރި ތަފާސްހިސާބުތަކަށް ބަލާއިރު، ދައުލަތުގެ ބެލުމުގެ ދަށުގައި އެންމެގިނައިން ތިބީ، ފިރިހެންކުދިންނެވެ. ޖުލައިމަހުގެ ނިޔަލަށް ދައުލަތުގެ ބެލުމުގެ ދަށުގައި 82 ފިރިހެންކުދިން ތިބިއިރު، އަންހެންކުދިންގެ އަދަދު އުޅެނީ 70 ކުދިންނެވެ. ހުސްވި ޖުލައިމަހު އެކަނިވެސް ދައުލަތުގެ ބެލުމުގެ ދަށަށް 6 ކުއްޖަކު ނެގިފައިވާއިރު، މީގެ ތެރޭގައި ހިމެނެނީ 2 ފިރިހެން ކުދިންނާއި 4 އަންހެންކުދިންނެވެ. 

އާއިލާއާ ބެހޭ ވުޒާރާއިން ބުނީ މި މުއްދަތުގެ ތެރޭގައި ދައުލަތުގެ ބެލުމުގެ ދަށުގައި ހުރި އެއް ކުއްޖަކު އަނބުރާ އާއިލާއާ ހަވާލުކޮށްފައިވާކަމަށެވެ. މީގެ އިތުރުން ދައުލަތުގެ ބެލުމުގެ ދަށުގައި ހުރި 01 ކުއްޖަކު ވަނީ ފޯސްޓަރ ޢާއިލާއަކާއި ހަވާލުކުރެވިފައިވާކަމަށްވެސް އާއިލާއާ ބެހޭ ވުޒާރާއިން ބުންޏެވެ.

ދައުލަތުގެ ބެލުމުގެ ދަށުން މާލޭގެ އިތުރުން އަތޮޅުގެ ބައެއް ރަށްތަކުގެ ސެންޓަރުތަކުގައިވެސް ކުދިން ބަލަހައްޓަމުން ގެންދެއެވެ.

ރާއްޖޭގައި އާއިލީ އަދި ކުޑަކުދިންނާ ގުޅޭ މައްސަލަތައް އިތުރުވަމުންދާކަމަށް ކަމާބެހޭ އިދާރާތަކުގެ ތަފާސްހިސާބުތަކުން ދައްކާއިރު، ހުސްވި ޖުލައި މަހު އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއަށް ކުޑަކުދިންގެ ހައްޤުތަކާ ގުޅުންހުރި 05 މައްސަލަ ވަނީ ހުށަހެޅިފައެވެ. މި މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައިވަނީ ކުދިން ސްކޫލަށް ނުފޮނުވުމުގެ މައްސައެވެ. ޖުލައިމަހުގެ ތެރޭގައި ކުދިންގެ އަހުލާގީ 20 މައްސަލަ ރިޕޯޓްކޮށްފައިވާއިރު، ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 93 މައްސަލައެއް ހުށަހެޅިކަމަށް އާއިލާއާ ބެހޭ ވުޒާރާގެ ތަފާސްހިސާބުތަކުން ދައްކައެވެ.