ހދ.މަކުނުދޫގައި މި ސަރުކާރުން ގާއިމްކުރާނީ އެންމެ މަތީ ފަންތީގެ ސިއްހީމަރުކަޒެއްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ހދ އަތޮޅުގެ ރަށްތަކަށް ކުރައްވަމުންގެންދަވާ ޒިޔާރަތުގެ ތެރެއިން މިއަދު މަކުނުދޫއަށް ވަޑައިގެން އެރަށުގެ ރައްޔިތުންނާ ވާހަކަދައްކަވަމުން ރައީސް ވިދާޅުވީ، މަކުނުދޫގައި ގާއިމްކުރާނީ ލެވެލް 4 ގެ ސިއްހީ މަރުކަޒެއް ކަމަށެވެ. އެތަނުގައި ވަރަށްގިނަ ހިދުމަތްތަކެއް ފައްޓަވާނޭކަން ފާހަގަކުރައްވަމުން ރައީސް ވިދާޅުވީ، ސިއްހީމަރުކަޒު ތަރައްޤީވެ ނިމުމުން އެތަނުގައި ހާއްސަ ބަލިތަކަށް ފަރުވާކުރައްވާ ޑޮކްޓަރުންނާއި، އެކްސްރޭ އަދި ސްކޭން ކުރުމުގެ ހިދުމަތް ލިބޭނޭކަމަށެވެ.
ރައީސް ވިދާޅުވީ މަކުނުދޫގައި ގާއިމްކުރާ ސިއްހީ މަރުކަޒުން ޑަޔަލަސިސް ފަދަ ހިދުމަތްތައްވެސް ދެވިގެންދާނޭކަމަށާއި، ނަމަވެސް އެކަންކުރަން އަދި ވަގުތު ނަގާނޭކަމަށެވެ.
މަކުނުދޫގެ ތަރައްޤީގެ ޕްލޭނާ ގުޅޭގޮތުން ވާހަކަދައްކަވަމުން ރައީސް ވިދާޅުވީ، މަކުނުދޫ އެއާޕޯޓް ތަރައްޤީކޮށް ނިންމުމަކީ ހާއްސަ އިސްކަމެއްދެއްވާ އެ ކަންތައް ކަމަށާއި، އެ މަސައްކަތް ދެން ކުރިއަށްދާނީ ބާރު ސްޕީޑްގައި ކަމަށެވެ. ރައީސް ވިދާޅުވީ ދެން އެމަނިކްފާނު މަކުނުދޫއަށް ވަޑައިގަންނަވާނީ އެއާޕޯޓް ނިންމައި އެތަން ހުޅުވަންކަމަށެވެ.
މި މޭރުމުން ވާހަކަދައްކަވަމުން ރައީސް ވަނީ މަކުނުދޫގައި އެއާޕޯޓެއް ތަރައްޤީކުރުމުެގ ބޭނުން ފާހަގަކުރައްވާފައެވެ. އެގޮތުން މަކުނުދޫއަކީ އެކަހެރިކޮސް އޮންނަ ރަށަކަށްވެފައި ދަތުރުފަތުރު ކުރުމުގައި ހުރަސްތަކެއް ހުރިކަމަށް ރައީސް ވިދާޅުވިއެވެ.
ރައީސްގެ މި ދަތުރުފުޅުގެ ތެރެއިން މަކުނުދޫ ފުލުހުންގެ މަރުކަޒުގެ އިމާރާތުގެ ބިންގާ އަޅައި އަމަލީ މަސައްކަތް ފަށާފައިވާއިރު، މަކުނުދޫ ސިއްހީ މަރުކަޒުގެ އިމާރާތުގެ ބިންގާވެސް ވަނީ އަޅާފައެވެ.
Advertisement
This content is created and paid for by advertisers and does not involve Voice Journalists
