ޖަރުމަނުވިލާތުގެ މިއުނިކްގައި އެއްޗެއް ގޮވައި ހިނގި ހާދިސާގައި ދިވެއްސަކަށް ސީރިއަސް އަނިޔާތަކެއް ލިބިއްޖެއެވެ.

ވޮއިސްއަށް މައުލޫމާތު ލިބިފައިވާ ގޮތުގައި އެއްޗެއް ގޮވައި ހިނގި މި ހާދިސާގައި ސީރިއަސް އަނިޔާތަކެއް ލިބިފައިވަނީ، ބ.ތުޅާދޫއަށް ނިސްބަތްވާ ފައްޔާޒް ދާއޫދަށެވެ. 

ފައްޔާޒަށް ފަރުވާދެމުންދަނީ، މިއުނިކް ބޮގޭންހައުސަން ހޮސްޕިޓަލުގެ އައިސީޔޫގައެވެ. މައުލޫމާތު ލިބިފައިވާ ގޮތުގައި އޭނާގެ ހާލު ވަރަށް ސީރިއަސްއެވެ. ހާދިސާގެ މައުލޫމާތު އެހާ ސާފު ނުވިނަމަވެސް، އޭނާގެ ބޮލަށް ވަރަށްބޮޑަށް ގެއްލުން ލިބިފައިވާކަމަށް މި ހާދިސާގެ މައުލޫމާތު އެނގޭ ފަރާތަކުން ވޮއިސްއަށް ވަނީ ކަށަވަރުކޮށްދީފައެވެ. މި ހާދިސާ ހިނގީ ކޮން އިރަކުކަމެއް އަދި ސާފެއް ނުވެއެވެ.

ފައްޔާޒަކީ ރާއްޖޭގައި އުފެދުނު އެންމެފުރަތަމަ ކައިޓް ސާފަރުންގެ ތެރޭގައި ހިމެނޭ ޒުވާނެކެވެ.

ފައްޔާޒް މިހާރު ދިރިއުޅެމުން އަންނަނީ ޖަރުމަނުވިލާތުގައެވެ. އޭނާގެ އަންހެނުންނަކީ ޖަރުމަނުވިލާތުގެ ރައްޔިތެކެވެ. ފައްޔާޒުގެ ކުޑަ ފިރިހެން ކުއްޖަކު ހުންނައިރު، އޭނާ ކުރިން ދިރިއުޅެމުން އައިސްފައިވަނީ ތުޅާދޫގައެވެ. ފައްޔާޒަކީ އެންމެންނާ ގުޅޭ ވަރަށް ހިތްހެޔޮ ޒުވާނެއްކަމަށް ތުޅާދޫ މީހުން ފާހަގަކުރެއެވެ.

މިކަމާ ގުޅޭގޮތުން ޖަރުމަނު އެމްބަސީއަށް ގުޅާލުމުން އެދުނީ ހާރިޖިއްޔާއާ ގުޅައިގެން މައުލޫމާތު ހޯދުމަށެވެ. ވޮއިސް އިން މިކަމުގައި ދިވެހި ހާރިޖިއްޔާގެ ބަހެއް ހޯދާލުމަށް މީޑިއާ އޮފިސަރާ ގުޅިނަމަވެސް ފޯނަށް ޖަވާބު ނުދޭތީވެ އަދި ވަނީ މައުލޫމާތު ލިބޭގޮތް ނުވެފައެވެ.