ސަރުކާރުގެ ސްކޫލަކަށް ވަންނަށް ނޭދި، އަމިއްލަ ގޮތުން ޕްރައިވެޓް ސްކޫލަކަށްދާ ކުއްޖާގެ ފީ ދެއްކުމަކީ ދައުލަތުގެ ޒިންމާއެއް ނޫން ކަމަށް އެޑިއުކޭޝަން މިނިސްޓަރު އިސްމާއީލް ޝަފީއު ވިދާޅުވެއްޖެ އެވެ.

އޭނާ މިހެން ވިދާޅުވީ އަމިއްލަ ސުކޫލްތަކުގައި މަތީ ސާނަވީއަށް ކިޔަވާ ދަރިވަރުންނަށް ސަރުކާރުން ދެމުންދާ ފީ ކަނޑާލުމުން ބެލެނިވެރީންގެ ކަންބޮޑުވުންތަކަށް ރައްދުދީ ސަރުކާރުގެ ނިންމުން ދިފާއުކޮށް ފޭސްބުކްގައި ކުރި ޕޯސްޓެއްގަ އެވެ.

ޝަފީއު ވަނީ ސަރުކާރުގެ ސްކޫލްތަކުގައި ހިލޭ ކިޔެވޭނެ ކަމަށާ ގްރޭޑް 11 އަދި 12 އަށް ވަކި ގޮތެއް ހެދުމަކީ އިންސާފުވެރި ގޮތެއް ނޫން ކަމަށް ވިދާޅުވެފަ އެވެ. އެގޮތަށް އެކަން ކުރާނަމަ ގްރޭޑް 1ން ފެށިގެން 10އަށް ސަރުކާރުގެ ސްކޫލަކަށް ވަންނަން ނޭދި އަމިއްލަގޮތުން ޕްރައިވެޓް ސްކޫލަށް ވައްދާ ކުއްޖާއަށް ވެސް ފީދައްކަން ވާނެ ކަމަށް އޭނާ ވިދާޅުވި އެވެ.

"ނަތީޖާއަކީ އަމިއްލަ ސްކޫލްތަކުގެ ބޭނުން ކެނޑުން. ސަރުކާރުގެ ސްކޫލަކަށް ވަންނަން އެދި، އެ ރަށެއްގައި ހުންނަ ސަރުކާރުގެ ސްކޫލަކުން ޖާގަ ނުދެވޭ ހާލަތުގައި މިނިސްޓްރީން ފީދައްކާނެ,"

އޭނާ ވިދާޅުވީ ދުނިޔޭގެ ބައެއް މަދު ގައުމުތަކުގައި ދީނީ ގޮތުންނާއި ސަގާފީ ގޮތުން ހުންނަ ތަފާތުތަކަށް ރިއާޔަތްކޮށް ބައެއް ދަރިވަރުންނަށް އެހީދޭ ކަމަށާ ނަމަވެސް ރާއްޖޭގައި އެފަދަ ހާލަތެއް ނެތް ކަމަށެވެ.

".. އެއް ދީނެއް. އެއް ސަގާފަތެއް. ކިޔަވައިދެނީ އެއް ކަރިކުލަމަކަށް، ކުދިން ހަދާނީ އެއް އިމްތިހާނެއް. އަމީނިއްޔާ ދަރިވަރުން ހަދާ އިމްތިހާނު ބިލަބޮން ގައިވެސް ހަދާނީ. ވ. އަތޮޅު ތައުލީމީ މަރުކަޒު ދަރިވަރުން ހަދާ އިމްތިހާނު އިޔާޘުއްދީން ދަރިވަރުންވެސް ހަދާނީ,"

އަދި ވިދާޅުވީ ބައެއް ސްކޫލް އިންޓާނޭޝަނަލް ލޭބަލްގައި ހިންގިޔަސް، ހަގީގަތަކީ ނިޒާމު ގާއިމުކޮށްފައިވާ ގޮތުން ސާނަވީ ފެންވަރު އިމްތިހާނު ހަދާ ރާއްޖޭގެ ހުރިހާ ސްކޫލްތަކަކީ ވެސް އިންޓާނޭޝަލް ސްޓޭންޑަޑުގެ ސްކޫލްތައް ކަަމަށެވެ.

އަމިއްލަ ސުކޫލްތަކުގައި މަތީ ސާނަވީއަށް ކިޔަވާ ދަރިވަރުންނަށް ސަރުކާރުން އެހީތެރިވެދޭން ފެށީ ކުރީގެ ރައީސް މުހައްމަދު ނަޝީދުގެ ވެރިކަމުގަ އެވެ. އެކަމަށް ބަދަލެއް ނުގެނެސް އޮއްވާ އެކަން ހުއްޓާލީ މި ސަރުކާރުން ޝަފީއުގެ އިސްނެގުމަށެވެ.