މީޑިއާ ކޮންޓްރޯލްކުރާ ބިލް ތަސްދީގު ނުކުރުމަށް ރައީސް ނަޝީދު ގޮވާލައްވައިފި
ރައްޔިތުްނގެ މަޖިލީހަށް މިހާރު ހުށަހަޅާފައިވާ މީޑިއާ ކޮންޓްރޯލްކުރާ ބިލް ތަސްދީގު ނުކުރެއްވުމަށް ކުރީގެ ރައީސް މުހައްމަދު ނަޝީދު ގޮވާލައްވައިފިއެވެ.
އެކްސްގައި ކުރެއްވި ޕޯސްޓެއްގައި ރައީސް ނަޝީދު މިއަދު ވިދާޅުވީ، މިހާރު ރައްޔިތުންގެ މަޖިލީހުގެ ތަޅުމަށް ހުށަހަޅާފައިވާ އެ ބިލް ތަސްދީގުކޮށްފިނަމަ އެކަމުގެ ނޭދެވޭ އަސަރު މުޅި ގައުމަށް ކުރާނޭކަމަށެވެ.
ރާއްޖެއަށް މިނިވަން މީޑިއާގެ ވެއްޓެއް ގާއިމްކުރުމަށް އެންމެ ބުރަކޮށް މަސައްކަތްކުރެއްވި، ލިޔުއްވި ބައެއް ލިޔުއްވުންތަކާ ގުޅިގެން ޖަލުގެ ތޭރިތަކުގައި އުމުރުގެ ބައެއް ދުަވަސްތައް ހޭދަކުރެއްވި ރައީސް ނަޝީދު ވިދާޅުވީ، ހިޔާލްފާޅުކުރުމުގެ މިނިވަންކަން ސަރުކާރުން ހަނިކުރުމަކީ ޤައުމުގެ މިނިވަންކަމާއި ކުރިއެރުމަށް އެކަމުގެ ނޭދެވޭ އަސަރުކުރާނޭކަމެއްކަމަށެވެ. މި ޕޯސްޓްގައި ރައީސް ނަޝީދު ވަނީ މަޖިލީހަށް ހުށަހެޅިފައިވާ މީޑިއާ ބިލް ތަސްދީގުނުކުރުމަށް ރައީސް ޑރ.މުއިއްޒުގެ އަރިހުގައި އެދިވަޑައިގަންނަވާފަައެވެ.
މީޑިއާ ކޮންޓްރޯލްކުރުމުގެ ބިލް ރައްޔިތުންގެ މަޖިލީހަށް ހުށަހަޅުއްވާފައިވަނީ މިނިވަން މެމްބަރެއްގެ ގޮތުގައި ހުންނެވި، ތުޅާދޫ ދާއިރާގެ މެމްބަރު އަބްދުލްހަންނާން އަބޫބަކުރެވެ. ހަންނާން ހުށަހަޅުއްވާފައިވާ މި ބިލްގައިވާގޮތުން މީޑިއާ ރެގިއުލޭޓް ކުރުމަށް ކޮމިޝަނެއް ވުޖޫދަށް އަންނައިރު އެ ކޮމިޝަނުގައި ރައީސުލްޖުމްހޫރިއްޔާ އައްޔަނުކުރައްވާ 3 މެމްބަރަކު ތިއްބަވާއިރު، ކޮމިޝަނުގެ ރައީސަކުވެސް އައްޔަނުކުރަނީ ރައީސުލްޖުމްހޫރިއްޔާގެ ފަރާތްޕުޅުންނެވެ.
މީގެ އިތުރުން މި ބިލްގައި މައްސަލަ ބެލުމަށް އެންގުމަށްފަހުވެސް ފުލުހުންނަށް މީޑިއާ ހައުސްއަށް ގޮސް ވަނުމުގެ ފުރުސަތާއި ވަކިވަކި ނޫސްވެރިންނާއި މީޑިއާ ހައުސްތައް ބޮޑެތި އަދަދުތަކުން ޖޫރިމަނާކުރުމުގެ ބާރު ސަރުކާރަށް ލިބިދީފައި ވެއެވެ.
މީޑިއާ ކޮންޓްރޯލް ކުރާ ބިލް މަޖިލީހުން ބޭރުކުރުމަށް ނޫސްވެރިން ވަނީ ގޮވާލާފައެވެ. މީގެ އިތުރުން ނޫސްވެރިންގެ ބެލެނިވެރިފަރާތް ، މޯލްޑިވްސް މީޑިއާ ކައުންސިލުންވެސް ވަނީ ބިލް އަނބުރާ ގެންދިއުމަށް ގޮވާލާފައެވެ.
Advertisement
This content is created and paid for by advertisers and does not involve Voice Journalists
