މީޑިއާ ރެގިއުލޭޓްކުރުމަށް ރައްޔިތުންގެ މަޖިލީހަށް މިހާރު ހުށަހަޅާފައިވާ ބިލުގެ މައްސަލާގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު އާއި ނޫސްވެރިންގެ ބައްދަލުވުމެއް ފަށައިފިއެވެ.

މި ބައްދަލުވުން ކުރިއަށްދަނީ ރައީސުލްޖުމްހޫރިއްޔާގެ އޮފީހުގައެވެ. ބައްދަލުވުމުގައި މޯލްޑިވްސް ޖާނަލިސްޓް އެސޯސިއޭޝަނުގެ އިސް ނޫސްވެރިންނާއި، ސީނިއާ ނޫސްވެރިން ބައިވެރިވެއެވެ. ރައީސް ނޫސްވެރިންނާ ބައްދަލުކުރެއްވުމަށް ނިންމެވީ، މީޑިއާ ކޮންޓްރޯލްކުރާ ބިލާ ގުޅިގެން ނޫސްވެރިންގެ ބޮޑެތި ކަންބޮޑުވުންތަކެއް ފާޅުކުރުމުންނެވެ.

އެގޮތުން މީޑިއާ ބިލް މައްސަލާގައި ނޫސްވެރިން ވަނީ އިއްޔެ އާއި މިއަދު ރައީސް އޮފިސް ދޮށުގައި އިހްތިޖާޖުކުރުން ކުރިއަށްގެންގޮސްފައެވެ. މިއަދު ރައީސް އޮފީސް ދޮށުގައި ކުރި އިހުތިޖާޖުގައި ބައިވެރިވި ނޫސްވެރިންނާ ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިމް ޚަލީލާއި ޔޫތު މިނިސްޓަރު އިބްރާހިމް ވަހީދު (އަސްވާޑު) ވަނީ ބައްދަލުކުރައްވައި ނޫސްވެރިންގެ ކަންބޮޑުވުންތައް އަޑުއައްސަވާފައެވެ. 

މި ބައްދަލުވުމުގައި ދެ ބޭފުޅުން ވަނީ މީޑިއާ ބިލް ކޮމިޓީ މަރުހަލާގައި ބަދަލުގެނައުމުގެ ފުރުސަތު އޮތްކަން ފާހަގަކުރައްވާފައެވެ. އަދި މީޑިއާ ކޮންޓްރޯލްކުރުމުގައި ރައީސްގެ ބައިވެރިވުން އޮންނަން ބޭނުން ނުވާކަންވެސް ވަނީ ވިދާޅުވެފައެވެ.

މީޑިއާ ކޮންޓްރޯލްކުރާ ބިލް މަޖިލީހަށް ހުށަހެޅުއްވ އަމިއްލަ މެމްބަރެއްކަމަށްވާ ތުޅާދޫ ދާއިރާގެ މެމްބަރު އަބްދުލްހަންނާން އެވެ. މި ބިލް މަޖިލީހުން ބޭރުކުރުމަށް ނޫސްވެރިންގެ ޖަމިއްޔާ އާއި މީޑީއާތަކުން ދަނީ ގޮވާލަމުންނެވެ.