މީޑިއާ ބިލް އަނބުރާ ނަގަންޖެހޭ ސަބަބެއްނެތް: އުޝާމް
މީޑިއާ ބިލް އަނބުރާ ނަގަންޖެހޭ ސަބަބެއްނެތްކަމަށް ދައުލަތުގެ ބަންޑާރަ ނައިބު އަހުމަދު އުޝާމް ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އުޝާމް ވިދާޅުވީ މަޖިލީހުގައި މިހާރު އޮތް މޯލްޑިވްސް މީޑިއާ ރެގިއުލޭޝަންބިލް އަނބުރާ ނަގަންޖެހޭ ސަބަބެއް އޮތްކަމަށް ދެކިވަޑައި ނުގަންނަވާ ކަމަށެވެ.
އުޝާމް ވިދާޅުވީ މީޑިއާބިލުގައި މީޑިއާއަށް ހަރުކަށި ފިޔަވަޅުތަކެއް ހުރިކަމަށް ގަބޫލުނުކުރައްވާ ކަމަށާއި، ބިލް ދިރާސާކުރުމަށްފަހު ފަހުން ކަންކަން ރަނގަޅުކުރެވިދާނެ ކަމަށެވެ. އުސާމް ވިދާޅުވީ 2022 ވަނަ އަހަރުގެ އޮގަސްޓްމަހުގެ ތެރޭގައި މީޑިއާ ކައުންސިލުން ފޮނުވާފައިއޮތް ބިލެއްގެ ޑްރާފްޓެއް އޮތްއިރު އޭގައި ބަޔާންކުރާ ކަންތައްތަކާ މިހާރު ބިލާއި މާބޮޑު ތަފާތެއް ނެތްކަމަށެވެ.
އެގޮތުން މީޑިއާ ކައުންސިލުން ފޮނުވާފައިވާ އެ ބިލުގައިވެސް ރައީސުލްޖުމްހޫރިއްޔާ އައްޔަނުކުރައްވާ 2 މެމްބަރުން ހިމެނޭކަން ބަންޑާރަނައިބު ފާހަގަކުރެއްވިއެވެ.
މީޑިއާ ބިލް މައްސަލާގައި މިއަދު ނޫސްވެރިން ވަނީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުއާ ރައީސް އޮފީހުގައި ބައްދަލުކުރައްވާފައވެެ. މި ބައްދަލުވުމުގައި ރައީސް ވަނީ މީޑިއާތަކަށް ދެރަވާގޮތަށް ކަންކަން ނުކުރާނޭކަމަށް ވިދާޅުވެފައެވެ. އަދި މި ސަރުކާރަކީ މީޑިއާ ޕްރޯ ސަރުކާރެއްކަން ރައީސް ތަކުރާރުކުރެއްވިއެވެ. ނަމަވެސް ބިލް އަނބުރާ ގެންދަވާނޭކަމުގެ ވާހަކައެއް ރައީސް ވިދާޅުވެފައި ނުވާކަމަށް އެ ބައްދަލުވުމުގައި ބައިވެރިވި ނޫސްވެރިން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
