ރާއްޖެއަށް ދިމާވެފައިވާ މާލީ ނުތަނަވަސްކަމުން އަރައިގަތުމަށް ރައްޔިތުންގެ އެއްބާރުލުން ސަރުކާރަށް ބޭނުންވާނޭކަމަށް ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު  ކޮންގް ޝިންހުއާ ވިދާޅުވެއްޖެއެވެ.

ދައުލަތުގެ މީޑިއާގެ ޕްރޮގްރާމެއްގައި ވާހަކަދައްކަވަމުން ޝިންހުއާ ވަނީ ރާއްޖެއާ މެދު ދެކެވަޑައިގަންނަވާގޮތާއި، ރާއްޖޭގެ އިގްތިސާދީ ކުރިމަގު އޮތްގޮތާ ގުޅޭގޮތުން އެމަނިކްފާނުގެ ވިސްނުން ހާމަކުރައްވާފައެވެ. ޝިންހުއާ ވަނީ މީގެ ކުރިން ދިވެހި ނޫސްވެރިންނާ މިއަހަރުގެ މެއިމަހުގެ ތެރޭގައި ބައްދަލުކުރައްވާފައެވެ. އެ ބައްދަލުވުމުގައި ސަފީރު ވަނީ ރާއްޖެއަށް ދިމާވެފައިވާ މާލީ ހާލަތުން އަރައިގަތުމުގެ ގާބިލްކަން ދިވެހިންނަށް ލިބިގެންވާކަމަށް ވިދާޅުވެ، ރާއްޖޭގެ އިގްތިސާދާމެދު ޔަގީންކަން އޮތްކަމަށް ވިދާޅުވެ ވާހަކަދައްކަވާފައެވެ.

ސަފީރު ވިދާޅުވީ ރާއްޖެއަށް ކުރިމަތިވެފައިވާ މާލީ ހާލަތުން އަރައިގަތުމަށް ސަރުކާރުގެ ގާބިލްކަމަށް އިތުބާރުކުރަންޖެހޭ ކަމަށެވެ. އެގޮތުން ޤައުމުގެ އިގްތިސާދީ އުފާފާގަތިކަމަށް އިޖުތިމާއީ އަދި ސިޔާސީ ހަމަޖެހުމަކީ ވަރަށް މުހިއްމު ކަމެއްކަމަށް ސަފީރުގެ ވާހަކައިގައި ވިދާޅުވިއވެެ.

ޝިންހުއާ ވަނީ ރާއްޖެއާ ޗައިނާއާ ދެޤައުމުގެ ދެމެދުގައި އުފެދިފައިވާ ސިޔާސީ ގުޅުމުގެ ތެރެއިން ރާއްޖޭގެ އިގްތިސާދީ އަދި އުމްރާނީ ކުރިމަގަށް ކުރަމުންގެންދާ މަސައްކަތްތަކުގެ މައްޗަށްވެސް ވާހަކަދައްކަވާފައެވެ. އެގޮތުން ޗައިނާ އާއި ދިވެހިރާއްޖެއާ ދެމެދު ގާއިމްކުރެވިފައިވާ މިނިވަން ވިޔަފާރީގެ އެއްބަސްވުމުެގ ދަށުން ދިވެހިންނަށް ކުރިން ނުލިބިއޮތް ފުރުސަތުތަކެއް ފަހިވެގެން ގޮސްފައިވާކަން ފާހަގަކުރެއްވިއެވެ.

ޝިންހުއާ ވިދާޅުވީ މިނިވަން ވިޔަފާރީގެ އެއްބަސްވުމާއެކު ދިވެހި ގިނަ އުފެއްދުންތަކެއް ޗައިނާ މާކެޓަށް ނެރުމުގެ ފުރުސަތު ލިބިފައިވާކަމަށެވެ. އެގޮތުން ރާއްޖެއިން މަހުގެ އުފެއްދުންތައް ޗައިނާ މާކެޓަށް ނެރުމުގެ މުހިންމުކަން ފާހަގަކުރައްވަމުން ސަފީރު ވިދާޅުވީ، ޗައިނާއަކީ މަހުގެ އެކި އުފެއްދުންތައް އެންމެގިނައިން އެތެރެކުރާ ޤައުމުކަމުން އޭގެ ފައިދާ ދިވެހިންނަށް ނެގެން އެބައޮތްކަމަށެވެ. އެގޮތުން ރާއްޖެއިން އެންމެގިނައިން އެކްސްޕޯޓްކުރަނީ މަހުގެ އުފެއްދުންތައްކަމުން އެކަމުގެ މަންފާ ޗައިނާ މާކެޓަށްވަދެ ނެރެވެން އެބައޮތްކަމަށް ސަފީރުގެ ވާހަކަފުޅުގައި ފާހަގަކުރެއްވިއެވެ.

ޗައިނާ ސަފީރެއްގެ ގޮތުގައި ރާއްޖެއަށް ކޮން ޝިންހުއާ ހަމަޖައްސަވާފައިވަނީ މިއަހަރުގެ މެއިމަހުގެ ތެރޭގައެވެ. ޝިންހުއާ އެންމެފުރަތަމަ ރާއްޖެއަށް ޒިޔާރަތްކުރެއްވީ މީގެ އަހަރުތަކެއްކުރިން ފަތުރުވެރިއެއްގެ ގޮތުގައެވެ. ޝިންހުއާ އަކީ ރާއްޖޭގައި ތިއްބަވާ އެހެން ޤައުމުތަކުގެ ސަފީރުންނާ ހިލާފަށް ރާއްޖެއާމެދު ހައްސަ ގޮތްތަކެއް ބަހައްޓަވާކަމަށް ގިނަ ބަޔަކު ފާހަގަކުރާ ޑިޕްލޮމެޓެކެވެ. އެގޮތުން ކޮންމެ ދުވަހަކު އެމަނިކްފާނުގެ ސޯޝަލް މީޑިއާ ޕޯސްޓްތަކުގައި ރާއްޖޭގެ މަންޒަރުތައް ޕޯސްޓްކުރެއްވުމަކީ ގިނަބަޔަކު ފާހަގަކުރާ ކަމެކެވެ.