ކުޅަދާނަ ލިޔުންތެރިޔާ ޢަބްދުﷲ ޖަމީލް ލިޔުއްވި އަލިރަސްގެފާނު ވާހަކައާއި ބޮޑުތަކުރުފާނު ވާހަކަ ނެރެފިއެވެ.
އަލިރަސްގެފާނު ވާހަކައާއި ބޮޑުތަކުރުފާނުވާހަކަ ނެރުމުގެ ހަފްލާ ބާއްވާފައިވަނީ ޤައުމީ ޔުނިވަރސިޓީގެ އޮޑިޓޯރިއަމްގައި އެކަމަށްޓަކައި ބޭއްވި ހާއްސަ ހަފްލާގައެވެ. މި ދެ ފޮތް ނެރެދެއްވީ، ވިޔަފާރިވެރިޔާ، މުހައްމަދު އަލީ ޖަނާހް އާއި އޭނާގެ މަންމާފުޅެވެ.
ފޮތް ނެރުމުގެ ހަފްލާގައި ޖަމީލް ވަނީ، މި ވާހަކަތައް ފޮތެއްގެ ސިފާގައި ނެރުމަށް ގައުމީ ޔުނިވާސިޓީގެ ޗާންސެލަރު ޑރ. މަޙްމޫދު ޝައުގީ ދެއްވި ހިތްވަރު ފާހަގަކުރައްވާފައެވެ. ޖަމީލް ވިދާޅުވީ މި ދެ ފޮތުގެ ވާހަކަތައް ގެނެސްދީފައިވާނީ މިހާރުގެ ކުދިންނަށް ޝައުގުވެރިވާނޭހެން ކިޔާލަން އަދި ގެންގުޅެންވެސް ފަސޭހަވާނޭގޮތަށް ކަމަށެވެ. މިގޮތުން މި ދެ ފޮތަކީ އޭގެން ކިޔަވާ ކުދިންނަށް ރަނަގޅު މަންފާއެއްކުރާ އަދި ޤައުމީ އަބްތާލުންނާބެހޭ ރަނގަޅު ތަސައްވުރެ އުފެދޭނޭ ވާހަކަތަކަކަށް ވާނޭކަމަށް ކުރި މަސައްކަތްތަކެއްކަންވެސް ޖަމީލްގެ ވާހަކާގައި ފާހަގަކުރެއްވިއެވެ.
ޖަމީލް ލިޔުއްވި ވާހަކަފޮތްތައް ނެރުމުގެ ހަފްލާ..
މި ހަފްލާގައި ފޮތް ނެރުމުގައި އެހީތެރިވެދެއްވި ޖަނާހް ވަނީ އޭނާ މި މަސައްކަތުގެ ޝައުގުވެރިކަން އުފެދުނުގޮތް ވަރަށް ތަފްސީލީގޮތެއްގައި އަލިއަޅުއްވާލައްވައި ވާހަކަދައްކަވާފައެވެ. އެގޮތުން ޤައުމުތަކަށް ކުރެއްވި ދަތުރުފުޅުގައި އެޤައުމުތަކުގެ ތާރީހާ ގުލޭގޮތުން ދަސްވި ފިލާވަޅުތަކުން، ރާއްޖެ މިއަދު މިނިވަން ޤައުމެއްގެ ގޮތުގައި ދެމިއޮތުމުގައި ބޮޑުތަކުރުފާނާއި އަލިރަސްގެފާނު ފަދަ ބަތަލުން ކުރެއްވި މަސައްކަތް ޖަނާހް ފާހަގަކުރެއްވިއެވެ. އެގޮތުން ޖަމީލްގެ މިފަދަ މަސައްކަތަކަށް އެހީތެރިވެދިނުމަށް ނިންމީ ޤައުމަށްޓަކައި ކުރާ ކަމެއްގެ ގޮތުގައިކަން ޖަނާހް ވިދާޅުވިއެވެ.
ޖަމީލް ލިޔުއްވި ވާހަކަފޮތްތައް ނެރުމުގެ ހަފްލާ..
ޖަމީލަކީ މީގެ ކުރިންވެސް އަދަބީ މި ފަންނުގައި ފާހަގަކޮށްލެވޭފަދަ ފޮތްތަކެއް ލިޔުއްވާފައިވާ ކުޅަދާނަ މުޞައްނިފެކެވެ. އޭނާ ލިޔުއްވި ފާހަގަކޮށްލެވޭ ފޮތްތަކުގެ ތެރޭގައި އޯކިޑް ނަމުގައި ކުރީގެ ރައީސް މުހައްމަދު އަމީންގެ ހަޔާތާ ގުޅޭ ފޮތާއި، މަޝްހޫރު ވިޔަފާރިވެރިޔާ ގާސިމް އިބްރާހީމްގެ ހަޔާތްޕުޅުގެ މައްޗަށް ލިޔުއްވާފައިވާ ފޮތް ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
