ދިވެހި ފަތުރުވެރިކަމުގެ ސިނާއަތުގެ އެއް ބާނީ އަދި ޔުނިވާސަލްގެ ވެރިޔާ، މުހައްމަދު އުމަރު މަނިކު (އެމްޔޫ މަނިކު) ގެ މައްޗަށް ޣައިބަށް ކަށުނަމާދު ކުރުމަށް ނިންމައިފި އެވެ.

އިސްލާމިކް މިނިސްޓްރީން ބުނީ މަނިކުގެ މައްޗަށް ޣައިބަށް ކުރެވޭ ކަށުނަމާދު މިއަދު އަޞްރު ނަމާދަށް ފަހު އިސްލާމީ މަރުކަޒުގައި އޮންނާނެ ކަމަށެވެ.

މަނިކުގެ ޖަނާޒާ އޮތީ ސިންގަޕޫރުގަ އެވެ. ކަށުނަމާދު ކުރުން އޮތީ އެ ގައުމުގެ މަސްޖިދުލް ފްސާރާ އަމަން ގައި އަޞްރު ނަމާދަށް ފަހު އެވެ.

އެމަނިކުފާނު އަވަހާރަވީ ސިންގަޕޫރުގެ މައުންޓް އެލިޒަބެތް ހޮސްޕިޓަލުގައި ފަރުވާ ދެމުން ދަނިކޮށެވެ. އެމްޔޫމަނިކް އާލާސްކަންފުޅާ އުޅުއްވާތާ ދުވަސްތަކެއް ވެފައިވާއިރު، ހޮސްޕިޓަލްގައި އެޑްމިޓްކޮށްފައިވަނީ މީގެ މަހެއްހާ ދުވަސްކުރިންނެވެ. 

ރާއްޖޭގެ ފަތުރުވެރިކަމުގެ ސިނާއަތް 1972 ވަނަ އަހަރު ވޫޖޫދަށް އާއިރު، އެމްޔޫ މަނިކަކީ އެކަމުގައި އެންމެ އިސްކޮށް ހަރަކާތްތެރިވެ ވަޑައިގެންނެވި އެއްބޭފުޅާއެވެ. އެމްޔޫމަނިކަކީ ކުރިން ދައުލަތުގެ އިސް މަގާމްތަކެއް ފުރުއްވި ބޭފުޅެކެވެ. ނަމަވެސް އުމުރުގެ ބޮޑުބައި މިހާތަނަށް ހޭދަކުރެއްވީ އަމިއްލަ ވިޔަފާރީގައެވެ. އެންމެފަހުން އެމްޔޫމަނިކް އަދާކުރެއްވި ދައުލަތުގެ ވަޒީމާއަކީ އެމްއޭސީއެލްގެ ޗެއާމަންކަމުގެ މަގާމެވެ.