ނިޝާން މުލީގެ ޝަރަފްގެ އިއްޒަތުގެ ވެރިޔާ، މުހައްމަދު އުމަރުމަނިކު (އެމްޔޫމަނިކު) ގެ ޤައުމީ ހިދުމަތް ދިވެހި ތާރީހުގައި ފަވާލެވޭނީ ރަން އަކުރުންކަމަށް އެމްޑީޕީން ބުނެފިއެވެ.
އެމްޔޫމަނިކް އަވަހާރަވުމުގެ ހިތާމާގައި އެމްޑީޕީން ނެރުނު ބަޔާނުގައި ބުނެފައިވަނީ، އެމަނިކްފާނަކީ ދިވެހިރާއްޖޭގެ މުޅި ތާރީހު ބަދަލުކޮށްލައްވައި، ރާއްޖެއަކީ ދުނިޔޭގެ ފެންވަރުގެ ފަތުރުވެރިކަމުގެ މަންޒިލަކަށް ހެއްދެވުމުގެ އެއް ބާނީ ކަމަށެވެ.
އެމްޔޫމަނިކަކީ މުޅި ދުނިޔެއަށް ރާއްޖެ ހުޅުވާލައި، މި ޤައުމަށް ލިބިފައިވާ ޤުދުރަތީ މުއްސަނދިކަމުން ނަފާ ހޯދޭނެކަން ސާބިތުކޮށްދެއްވި ވިޝަނަރީ ލީޑަރެއްކަން ފާހަގަކުރަމުން އެމްޑީޕީގެ ބަޔާނުގައި ބުނެފައިވަނީ، ފަގީރު ޤައުމުތަކުގެ ލިސްޓުން އުނިވެ، ތަރައްޤީވަމުން އަންނަ ޤައުމެއްގެ ގޮތުގައި ރާއްޖެ ވެގެންދިޔައީ، އެމަނިކުފާނާއި މަދު ބޭފުޅުންތަކެއް އިސްވެ ފެއްޓެވި މަސައްކަތްޕުޅުތަކުގެ ސަބަބުން ކަމަށެވެ. އަދި ފާއިތުވި ބައި ގަރުނުގައި ރާއްޖޭގެ އިގްތިސާދަށް އައި ހަލުއި ކުރިއެރުމުގެ އަސްލަކީ އެމަސައްކަތް ކަމަށްވެސް ބަޔާނުގައި ފާހަގަކުރިއެވެ.
މީގެ އިތުރުން އެމްޔޫމަނިކަކީ ރާއްޖޭގެ ޑިމޮކްރަސީގެ އިސްލާހީ ހަރަކާތްތަކަށް ތާއީދު ކުރައްވައި އެ ހަރަކާތަށް އެކި ގޮތްގޮތުން އެހީތެރިކަން ފޯރުކޮށްދެއްވި ބޭފުޅެއްކަމަށްވެސް އެމްޑީޕީގެ ބަޔާނުގައި ވަނީ ފާހަގަކޮށްފައެވެ.
އެމްޔޫމަނިކް އަވަހާރަވުމުގެ ހިތާމާގައި އެމްޑީޕީން ނެރުނު ބަޔާނުގައި ވަނީ އެމަނިކުފާނުގެ އާއިލާއަށް ތައުޒިޔާ ފޮނުވާފައެވެ.
Advertisement
This content is created and paid for by advertisers and does not involve Voice Journalists
