ރައީސް ޑރ.މުއިއްޒު، ޗައިނާގެ ރައީސް ޝީ ޖިންޕިންގ އާ ބައްދަލުކުރައްވައިފި
ރަސްމީ ދަތުރުފުޅެއްގައި މިހާރު ޗައިނާއަށް ވަޑައިގެން އުޅުއްވާ ރައީސުލްޖުމްހޫރިއްޔާ ޑރ.މުހައްމަދު މުއިއްޒު، ޗައިނާގެ ރައީސް ޝީ ޖިންޕިންގ އާ މިއަދު ބައްދަލުކުރައްވައިފިއެވެ.
ރައީސް ޑރ.މުއިއްޒު ޝީ ޖިންޕިންގ އާ ބައްދަލުކުރައްވާފައިމިވަނީ، މިއަދު ޓިއާންޖިންގައެވެ. ބައްދަލުވުމާ ގުޅޭގޮތުން އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ މި ބައްދަލުވުމުގައި ދެޤައުމު ގުޅިގެން ވެފައިވާ އެއްބަސްވުންތަކުގައި ކުރުމަށް ބަޔާންކޮށްފައިވާ ކަންތައްތައް ފުޅާކުރުމާއި އެކަންތައްތައް އަވަހަށް ކުރިއަށްގެންދިއުމާ ގުޅޭގޮތުން މަޝްވަރާކުރެވިފައިވާކަމަށެވެ.
ރައީސްގެ ޕޯސްޓްގައި ވިދާޅުވެފައިވަނީ ދެޤައުމު ގުޅިގެން ކުރިއަށްގެންދާ ތަރައްޤީގެ ކަންކަން ބިނާވެފައިވަނީ ޒަމާންވީ ދެޤައުމުެގ ގުޅުމާއި އެއްޤައުމު އަނެއްޤައުމުގެ މައްޗަށް އިހުތިރާމްކުރާ ހާލުގައި ކަމަށާއި އެގޮތުން މިހާތަނަށް ކުރިއަށްގެންދިއުމަށް ނިންމާފައިވާ ކަންކަން ކުރިއަށްގެންދާނޭ ގޮތްތަކާ ބެހޭގޮތުން ވާހަކަދެކެވުނުކަމަށެވެ. އެގޮތުން ޗައިނާ މޯލްޑިވްސް ކޮމްޕްރިހެންސިވް ސްޓްރެޓެޖިކް ކޯޕަރޭޓިވް ޕާޓްނަރޝިޕްގައި ކުރުމަށް އެއްބަސްވެފައިވާ ކަންކަމުގެ މައްޗަށް މި ބައްދަލުވުމުގައި ވާހަކަތައް ދެކެވިގެން ދިޔަކަން ރައީސްގެ ޕޯސްޓްގައި ވަނީ ފާހަގަކުރައްވާފައެވެ.
ރައީސް ޑރ.މުއިއްޒު އާއި ޝީ ޖިންޕިންގ ގެ މި ބައްދަލުވުމުގައި ދެ ޤައުމުގެ ކަމާބެހޭ ސީނިއާ އޮފިޝަލުންވެސް ވަނީ ބައިވެރިވެ ވަޑައިގެންފައެވެ.
މިދިޔަ އަހަރުެގ ޖޫންމަހު ރައީސް ޑރ.މުހައްމަދު ޗައިނާއަށް ކުރެއްވި ރަސްމީ ދަތުރުފުޅުގައި ވަނީ އެޤައުމާއެކު މުހިއްމު 20 އެއްބަސްވުމެއް ގާއިމްކޮށްފައެވެ. މީގެ ތެރޭގައި އިގްތިސާދީ، އުމްރާނީ ތަރައްޤީގެ އިތުރުން އިންސާނީ ވަސީލަތްތަކާއި ތިމާވެއްޓާ ގުޅުންހުރި މުހިއްމު އެެއްބަސްވުންތައް ހިމެނޭކަން ފާހަގަކޮށްލެވެއެވެ.
ރައީސް ޑރ.މުހައްމަދު މުއިއްޒު ޗައިނާއަށް ވަޑައިގެންފައިވަނީ، އެޤައުމުގެ ރައީސް ޝީ ޖިންޕިންގ ގެ ދައުވަތަކަށް ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ) ސަމިޓުގައި ބައިވެރިވެވަޑައިގެންނެވުމަށްޓަކައެވެ. މި ސަމިޓްގައި ދުނިޔޭގެ ނުފޫޒުގަދަ ލީޑަރުން ބައިވެރިވެ ވަޑައިގަންނަވާކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
