ދިވެހިރާއްޖެ ތަރައްޤީވެގެން މިހާހިސާބަށް އާއިއިރު އިންޖިނިއަރުންގެ ހިއްސާ ފާހަގަކުރެވިފައި ނުވާކަމަށް އިމާރާތްކުރުމާ ގެދޮރުވެރިކަމާ ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބް ވިދާޅުވެއްޖެއެވެ.

ޤައުމީ ފެންވަރުގައި ރާއްޖޭގައި އިންޖިނިއަރިންގެ ދުވަހެއް ފާހަގަކުރުމަށް ނިންމި ނިންމުމާ ގުޅޭގޮތުން އެކްސްގައި އާއްމުކުރެއްވި ވީޑިއޯ މެސެޖެއްގައި ވާހަކަދައްކަވަމުން މިނިސްޓަރު މުއްތަލިބް ވިދާޅުވީ، ފުރަތަމަ ފަހަރަށް ޤައުމީ ފެންވަރުގައި އިންޖިނިއަރިން ދުވަހެއް ފާހަގަކުރުމަށް ނިންމީ، ރާއްޖެ ތަރައްޤީވެ ކުރިއަރައިގެން މިހާހިސާބަށް އާއިރު، އިންޖިނިއަރުންގެ ހިއްސާ އެކަށީގެންވާ ގޮތެއްގައި ފާހަގަކުރެވިފައި ނެތުމުން އެކަމަށް ހިތްވަރުދިނުމުގެ ގޮތުންކަމަށެވެ.

މިނިސްޓަރު ވިދާޅުވީ އަލަށް މަދުރަސީ ދައުރު ނިންމައި މަތީތައުލީމަށްދާ ދަރިވަރުންގެ މެދުގައި އިންޖިނިއަރިންގެ ދާއިރާއިން ކުރިއަށްދިއުމުގެ ޝައުގުވެރިކަން ކުޑަކަމަށް ސަރުކާރަށް ފާހަގަކުރެވޭ ކަމަށާއި އެގޮތުން އެކަމަށް ހިތްވަރުދީ އިންޖިނިއަރިން ދާއިރާ ކުރިއެރުވުމަކީވެސް އެކަންކުރަން ނިންމި މައިގަނޑު އެއް ސަބަބުކަމަށް މިނިސްޓަރު މުއްތަލިބް ވިދާޅުވިއެވެ.

މިނިސްޓަރު ވިދާޅުވީ ރާއްޖެ މިހާހިސާބަށް އައުމުގައި އެކިއެކި ދާއިރާތަކުގެ އިންޖިނިއަރުން ކޮށްފައިވާ މަސައްކަތްތައް ފާހަގަކުރެވޭކަމަށާއި، އެގޮތުން އިމާރާތްކުރުމުގެ ދާއިރާގެ އިތުރުން މެކޭނިކަލް އިންޖިނިއަރިންނާއި، އެރޮނޯޓިކަލް އިންޖިނިއަރިްނގެ ދާއިރާގައި ހަރަކާތްތެރިވަމުން އަންނަ އިންޖިނިއަރުންގެ މަސައްކަތްތައް ފާހަގަކުރަަންޖެހޭކަމަށް މިނިސްޓަރު ވިދާޅުވިއެވެ.

ރާއްޖޭގައި ޤައުމީ ފެންވަރުގައި އިންޖިނޭރުންގެ ދުވަހެއް ފާހަގަކުރުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ނިންމެވީ މިއަހަރުގެ ޖޫންމަހުގެ ތެރޭގައެވެ. ރާއްޖޭގައި ކޮންމެ އަހަރެއްގެ އޮގަސްޓްމަހުެގ 30 ވަނަ ދުވަސް ފާހަގަކުރަނީ ޤައުމީ އިންޖިނިއަރިން ދުވަހުގެ ގޮތުގައެވެ.