ރައްޔިތުންގެ މަޖިލީހަށް މީޑިއާ ކޮމިޝަން ބިލް ހުށަހަޅާފައިވަނީ ބަލަންޖެހޭ ކަންކަމަށް ނުބަލައި ރަނގަޅަށް ދިރާސާކުރުމެއްވެސް ނެތިކަމަށް މޯލްޑިވްސް ބްރޯޑްކާސްޓިން ކޮމިޝަނުން ބުނެފިއެވެ.
މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ ބިލާގުޅޭގޮތުން މަޝްވަރާކުރުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއިން މިއަދު ވަނީ، މޯލްޑިވްސް ބްރޯޑްކާސްޓިންގ ކޮމިޝަންގެ ބޭފުޅުންނާ ބައްދަލުކޮށް ކޮމިޝަނުގެ ހިޔާލް ހޯދާފައެވެ. މި ބައްދަލުވުމުގައި ބްރޯޑްކޮމްގެ މެމްބަރުން ވަނީ ހުށަހަޅާފައިވާ މީޑިއާ ބިލުގައި ބޮޑެތި ކަންބޮޑުވުންތަކެއް ހުރިކަމަށް ފާހަގަކުރެައްވައި ބިލާމެދު ރުހެވެން ނެތްކަމަށް ހާމަކޮށްފައެވެ.
ބިލާ ގުޅޭގޮތުން ވާހަކަދައްކަވަމުން ކޮމިޝަންގެ ރައީސް ސަފާ ޝަފީގު ވަނީ މިފަދަ ބިލެއް އެކުލަވާލާއިރު ކަމާ ގުޅުންހުރި ފަރާތްތަކާއެކު މަޝްވަރާކުރަންޖެހޭނޭކަން ފާހަގަކުރައްވައި، ބިލުގެ މަސައްކަތް ނިންމާފައިވަނީ ކަމާ ގުޅުންހުރި ފަރާތްތަކާ އެކަން ހިއްސާނުކޮށްކަން ފާހަގަކުރައްވާފައެވެެ. އެގޮތުން ބިލް ހުށަހެޅިއިރު ބްރޯޑްކާސްޓިން ކޮމިޝަނާ މަޝްވަރާކޮށްފައިނުވާކަން ސަފާ ވިދާޅުވިއެވެ. އަދި ސަފާވަނީ ބިލް ޑްރާފްޓް ކުރުމުގެ މަރުހަލާގައި ކޮމިޝަނާ މަޝްވަރާކޮށްފައި ނުވާތީވެ އެކަމުގެ ކަންބޮޑުވުން ފާޅުކުރައްވާފައެވެ.
ސަފާ ވިދާޅުވީ ކޮމިޝަންތައް އެއް ފުރާޅެއްގެ ދަށަށް ގެންނައިރު، ކުރަންޖެހޭ ވަރަށް ބައިވަރު ކަންކަން ހުންނާނޭކަމަށާއި، މިހާރު ކަންކަން އިންތިޒާމުވެފައި ހުރިގޮތުން މީޑިއާ މޮނީޓަރ ނުކުރެވޭކަމަށެވެ. އެގޮތުން މިފަދަ ބިލަކަށް އަމަލުކުރަ ބަލާއިރު ވަސީލަތްތަކާއި އެނޫންވެސް ކަންކަން ހުރިގޮތުން ބިލްގައި ބަޔާންކޮށްފައިވާ ކަންކަން ކުރެވޭނޭކަމަށް ގަބޫލު ނުކުރެއްވޭކަމަށް ސަފާ ވިދާޅުވިއެވެ.
މިއީ އެއް ދުވަހުން ދެ ދުވަހަކުން ނޫނީ އެ މަސްތަކުން ކުރެވޭނެ ވަރުގެ ކަމެއް ވެސް ނޫން. ވަރަށް ބައިވަރު ކަންތައްތަ ބައިވަރު މި ޕްލެޓްފޯމްތަކެއް އެއްކޮށްލާ ވާހަކަ މި ދައްކަނީ. އަޅުގަނޑު މި ދައްކަނީ ނިއު މީޑިއާ ޑިޖިޓަލް މީޑިއާ ދެއްތޯ ދެން ހަމަ އެހެންމެ ބްރޯޑްކާސްޓް މީޑިއާ ޕްރިންޓް މީޑިއާ ހުރިހާ އެއްޗެހި އެއްކޮށްލާއިރު ވަރަށް ބައިވަރު ގަވާއިދުތައް ހަދަންޖެހޭނެ
ސަފާ ވިދާޅުވިއެވެ
ކޮމިޝަންގެ މެމްބަރު އާއިމިނަތު ޝަހާރަތު ވިދާޅުވީ، ބިލްގައި ނޫސްވެރިންނާއި މީޑިއާތައް ޖޫރިމަނާކުރުމުގެ ވާހަކަ ބަޔާންކުރާއިރު، އެކަމުގައި ބަލަންޖެހޭ އަދި ކުރަންޖެހޭ ދިރާސާތަކެއް އެބަހުރިކަމަށެވެ. އަދި ޖޫރިމަނާތައް ކުރެވޭނީ އެފަރާތްތަކަށް ލިބޭ އާމްދަނީ އާއި މާލީ ހާލަތާއި، އެނޫންވެސް ކަންކަމަށް ބެލުމަށްފަހިކަމަށް އޭނާ ފާހަގަކުރެއްވިއެވެ.
ބައްދަލުވުމުގައި މެމްބަރުން ވަނީ، މީޑިއާ ބިލެއް އެކުލަވާލާއިރު، ރާއްޖެއިން ބައިވެރިވެފައިވާ ބައިނަލްއަޤްވާމީ މުއާހަދާތަކަށް ރިޔާއަތް ކުރަންޖެހޭ ކަމަށާއި، އެކަންތައްތަކާ ފުށުއަރާތޯ ބެލުމަށްފަހު ނޫނީ މިފަދަ ބިލެއްގައި ބަޔާންކުރާ ކަންކަން ތަންފީޒުކުރެވެން ނޯންނާނެކަން ފާހަގަކުރައްވައި ވާހަކަދައްކަވާފައެވެ.
ރައްޔިތުްނގެ މަޖިލީހަށް މީޑިއާ ކޮންޓްރޯލް ކުރުމުގެ މި ބިލް ހުށަހެޅީ އަމިއްލަ މެމްބަރެއްކަމަށްވާ ތުޅާދޫ ދާއިރާގެ މެމްބަރު އަބްދުލްހައްނާން އަބޫބަކުރެވެ. މި ބިލަށް ސަރުކާރަށް ނިސްބަތްވާ މެމްބަރުން ތާއީދުކުރިނަމަވެސް އިދިކޮޅު މެމްބަރުން ވަނީ ބިލް ބޭރުކުރަންޖެހޭކަމަށް ގޮވާލާފައެވެ.
މީޑިއާ ބިލާ ގުޅިގެން މީޑިއާ ސެސޯސިއޭޝަންތަކުންނާއި ބައެއް މީޑިއާތަކުން ވަނީ ކަންބޮޑުވުން ފާޅުކޮށް ބިލް ބޭރުކުރުމަށް ގޮވާލާފައެވެ. މީގެ ތެރޭގައި މީޑިއާ ކައުންސިލާއި، މޯލްޑިވްސް ޖާނަލިސްޓް އެސޯސިއޭޝަން ހިމެނެއެވެ.
Advertisement
This content is created and paid for by advertisers and does not involve Voice Journalists
