މޫސުން އަލިވާނޭކަމަށް ލަފާކުރެވެނީ ބްރާސްފަތީގެ ފަހުން: މެޓް

މޫސުން އަލިދުވަހެއް... ފޮޓޯ: ވޮއިސް

މިހާރު ކުރަމުންދާގޮތަށް އަންނަ ބްރާސްފަތިދުވަހާ ހިސާބަށް ވިއްސާރަކުރާނޭކަމަށް މޫސުމާ ބެހޭ ޤައުމީ އިދާރާއިން ބުނެފިއެވެ.

މެޓް އޮފީހުން ލަފާކޮށްފައިވަނީ މިހާރު ކުރަމުންދާ ހުޅަނގު މޫސުމުގެ ވިއްސާރަ ރާއްޖޭގެ އެކި ސަރަހައްދުތަކަށް މިހަފްތާގެ ނިޔަލަށް ކުރާނޭ ކަމަށެވެ.

އެގޮތުން ކުރިއަށްއޮތް 24 ގަޑިއިރުގެ ތެރޭގައި މެދުރާއްޖެ ތެރޭގެ ރަށްރަށަށް ވިއްސާރައިގެ އަސަރުކުރާނޭކަމަށް ވަނީ ލަފާކޮށްފައެވެ. އެގޮތުން މެދުރާއްޖެ ތެރޭގެ ރަށްތަކަށް ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި ދެކުނުގެ އަތޮޅުތަކަށް ހުޅަނގުދެކުނާއި ހުޅަނގުން ގަޑިއަކު ފަސް މޭލާއި 15 މޭލު ދެމެދުގެ ބާރުމިނުގައި ވައިޖެހޭނޭކަމަށް ވަނީ ލަފާކޮށްފައެވެ.

އަންނަ ބްރާސްފަތި ދުވަހާ ހިސާބަށް ވިއްސާރަވިނަމަވެސް އެކި ހިސާބުތަކަށް މޫސުން ތަފާތުވާއިރު، އަންގާރަ ދުވަހާ ހިސާބަށް މެދުތެރޭގެ އަތޮޅުތަކަށް މޫސުން ރީތިވާނޭކަމަށް މެޓުން ވަނީ ލަފާކޮށްފައެވެ.

ހިނގަމުން މިދަނީ ހުޅަނގު މޫސުމުގެ އެގާރަވަނަ ނަކަތް ކަމަށްވާ "ފުރަ "ނަކަތެވެ. މި ނަކަތުގައި ދޭތެރެދޭތެރެއިން ވިއްސާރަކުރާއިރު، މި ނަކަތާއެކު ހުޅަނގު މޫސުމުގެ އެންމެ ގަދަ ދުވަސްތައް ނިމުމަކަށް އަންނާނޭކަމަށް ދުވަސްވީ މީހުން ބުނެއުޅެއެވެ.

ކޮމެންޓް