ކުޅުދުއްފުށީ ބަނދަރު ނެރުކައިރި ފަރަށް އެރި ހއ. ކެލާ ޑީއެމްއެލް އެކްސްޕްރެސް މިއަދުގެ ވަގުތެއްގައި ފުންކޮށްފިއެވެ.
ވޮއިސްއާ މައުލޫމާތު ހިއްސާކުރަމުން ކުޅުދުއްފުށީސިޓީ ރައްޔިތަކު ބުނީ، ބޯޓު ފުންކޮށްފައިވަނީ މިއަދު ހެނދުނުކަމަށެވެ. މި ބޯޓު ފަރަށް އަރާފައިވަނީ އިއްޔެ ހަވީރުގެ ވަގުތެއްގައެވެ.
ބޯޓުގެ އެއް ހިއްސާދާރު އަދަމް ގުފްރާން ބައެއް މީޑިއާތަކަށް މައުލޫމާތު ދެމުން ބުނެފައިވަނީ ބޯޓު ފަރަށް އެރީ އިންޖީނު ރަނގަޅުކޮށްގެން ކެލައަސް ދިއުމަށް ފަޅުން ނިކުންނަނިކޮށް އިންޖީނު ހުއްޓިގެން ކަމަށެވެ.
ބޯޓު ފަރަށް އުރުނީ އިންޖީނު ހުއްޓުމާ ގުޅިގެން ރަނގަޅޫކުރުމުގެ މަސައްކަތް ކުރަމުންދަނިކޮށް، އެންމެފަހުން ބޯޓު އޮއިގަނޑެއްގައި ޖެހިގެންނެވެ. ބޯޓު ފަރަށް އުރުނުއިރު އޭގައި ފެން ފިޔަވައި އެހެން އެއްވެސް ބާވަތެއްގެ މުދަލެއް ނެތެވެ. އެވަގުތު ބޯޓުގައި ތިބީ 4 ދިވެހިންނާއި ބަންގްލަދޭޝްގެ 6 މީހުންނެވެ. ބޯޓު ފަރަށް އެރުމާއެކު ފުންކުރުމުގެ މަސައްކަތް އިއްޔެއިން ފެށިގެންއައީ ކުރަމުންނެވެ.
ބޯޓު މިއަދު ފުންކޮށް ކުޅުދުއްފުށީ އެމްޕީއެލް ޕޯޓް ސަރަހައްދަށް ވަނީ ވައްދާފައެވެ.
Advertisement
This content is created and paid for by advertisers and does not involve Voice Journalists
