އުރީދޫއިން ޑިޖިޓަލް މަސްރޭސް ގޭމް ތައާރަފްކޮށް އެ މުބާރާތުގައި ބައިވެރިވުމުގެ ފުރުސަތު ހުޅުވާލައިފިއެވެ.

އުރީދޫއިން ބުނީ މިއަހަރުގެ މަސްރޭހާ ދިމާކޮށް ޑިޖިޓަލް މަސްރޭސް ގޭމް ތައާރަފްކޮށްފައިމިވަނީ، މަސްވެރިކަމަށް ލޯބިކުރާ ފަރާތްތަކަށް މުބާރާތުގައި އިތުރު ގޮތަކަށް ބައިވެރިވުމުގެ ފުރުސަތު ހޯދައިދިނުމަށް ކަމަށެވެ. މި ގޭމްގައި ބައިވެރިވާން ބޭނުންވާ ފަރާތްތަކަށް މިހިގާ ސެޕްޓެމްބަރުމަހުގެ 3 ވާ ބުރާސްފަތި ދުވަހުގެ 23:59 އާ ހަމައަށް ލައިވްކޮށް ކޮންމެ ވަގުތެއްގައި ވެސް، ކޮންމެ ތަނެއްގައި ވެސް ކުޅެވޭނެއެވެ.

އުރީދޫ މަސް ރޭސް 2025 ގައި ވާދަކުރާ ހަގީގީ ޓީމުތަކުގެ ނަންތައް ހިމެނިފައިވާ މަސް ރޭހުގެ އޮންލައިން ވާޝަނާ އެކު ކޮންމެ ފަރާތަކަށްވެސް ޓީމެއް އިޚްތިޔާރުކޮށް، މަސް ހިފުމަށް ޓެޕްކޮށް،ޕޮއިންޓް އެއްކޮށްގެން ލީޑަރބޯޑުގައި ކުރިއަށް ދިޔުމުގެ ފުރުސަތު ލިބިގެންދެއެވެ.  ޑިޖިޓަލީ ބާނާ ކޮންމެ މަހަކަށް އެއް ޕޮއިންޓް ލިބޭއިރު، މުބާރާތުގެ މުއްދަތުގެ ތެރޭގައި ވެސް ކުޅުންތެރިންނަށް ލީޑަރބޯޑުގެ ކުރިއަށް އެރުމުގެ ފުރުސަތު ލިބިގެންދާނެއެވެ.

އުރީދޫއިން ބުނީ ޑިޖިޓަލް މަސްރޭހަށް ރާއްޖޭގެ އެންމެ ބޮޑު ފިޝިން ޓެކްލް ފިހާރަ، ހައި ފިޝިން ޓެކްލްސްގެ ގެ ފަރާތުން އެއްވަނަ، 2 ވަނަ އަދި 3 ވަނައަށޤދާ ފަރާތްތަކަށް ޕްރިމިއަމް ފިޝިން ގިއާ އިނާމުގެ ގޮތުގައި ހުށައަޅާފައިވާކަމަށެވެ.

 - 1 ވަނަ : ޑައިވާ ސަލްޓިގާ 2025 ރީލް

-  2 ވަނަ އަދި 3 ވަނަ: ޕީއައިއޯ އަލްޓިމޭޓް ސީ ސްޕިރިޓް/ގޭންގްސްޓާ (އެޗް/ޑީ) ރޮޑްސް.

އުރީދޫއިން ބުނީ އެޕްލިކޭޝަން މެދުވެރިކޮށް ޑިޖިޓަލް މަސްރޭހުގައި ރާއްޖޭގެ ހުރިހާ ހިސާބަކުން ވެސް ހުރިހާ އެންމެންނަށް ބައިވެރިވުމުގެ ފުރުސަތު ފަހިކޮށްދިނުމަކީ އެކުންފުންޏަށް ލިބޭ ވަރަށް ބޮޑު އުފަލެއްކަމަށެވެ.

"މިއީ އަޅުގަނޑުމެންގެ ސަގާފަތާއި އާދަކާދަތަކާއި މަސްވެރިކަމަށް އޮތް ޝައުގުވެރިކަން ޑިޖިޓަލް ތަޖުރިބާއެއްގެ ސިފާގައި ފޯރުކޮށްދިނުމަށް ކުރާ މަސައްކަތުގެ ތެރެއިން ކަމެއް" އުރީދޫއިން ބުންޏެވެ.