ސަރުކާރުން 4 ރަށެއްގެ އައުޓްޑޯ ޖިމް ހެދުމުގެ މަސައްކަތް ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ) އާ ހަވާލުކޮށްފިއެވެ.

މިކަމާ ގުޅިގެން ވަނީ ސްޕޯޓްސް މިނިސްޓްރީއާއި އެ ކޯޕަރޭޝަނާ ދެމެދު އެއްބަސްވުމުގައި ސޮއިކޮށްފައެވެ. މި އެއްބަސްވުމުގެ ދަށުން 4 ރަށެއްގައި އައުޓްޑޯ ޖިމް ހެދުމުގެ އިތުރުން އެއް ރަށުގެ ފުޓްސަލް ދަނޑު ހެދުމަށް ވަނީ ނިންމާފައެވެ. އެއްބަސްވުމުގައިވާގޮތުން މަސައްކަތް ފަށާތާ 60 ދުވަހުގެ ތެރޭގައި ޖިމްތައް ހަދައި ނިންމަން ޖެހެއވެެ.

ޖިމްތައް ހެދުމަށް ހަވާލުކުރި ރަށްތަކުގެ ތެރެއިން މާކުރަތު އައުޓްޑޯ ޖިމްއެއްގެ މަސައްކަތް ނިންމަންޖެހެނީ، 60 ދުވަހުގެ ތެރޭގައެވެ. މަސައްކަތުގެ އަގަކީ 453،000 ރުފިޔާއެވެ. ކ. މާފުށީގައި އައުޓްޑޯ ޖިމްއެއްގެ މަސައްކަތް ހަވާލުކޮށްފައިވަނީ، 291،600 ރުފިޔާ އަށެވެ. ކ. ގާފަރުގައި އައުޓްޑޯ ޖިމްގެ މަސައްކަތް ހަވާލުކޮށްފައިވަނީ، 453،000 ރުފިޔާގެ އަގަކަށެވެ.

މީގެ އިތުރުން ތ. ތިމަރަފުށީ ފުޓްސަލް ދަނޑު ތަރައްޤީ ކުރުމުގެ މަސައްކަތް ހަވާލުކުރީ 1.7 މިލިއަން ރުފިޔާގެ އަގަކަށެވެ. އެ މަސައްކަތް 120 ދުވަހުގެ ތެރޭގައި ނިންމަން ޖެހެއެވެ.