ރީޖަނަލް އެއާޕޯޓްސްގެ ދަށުން ހިންގަމުން އައި ހުރިހާ އެއާޕޯޓެއް މޯލްޑިވްސް އެއާޕޯޓްސް ކޮމްޕެނީ ލިމިޑެޓްގެ ދަށަށް ބަދަލުކޮށްފި އެވެ.

ރީޖަނަލް އެއާޕޯޓްސްތައް އެމްއޭސީއެލްގެ ދަށަށް ބަދަލުކޮށް ރީޖަނަލް އެއާޕޯޓްސް ކޮމްޕެނީ އުވާލުމަށް ސަރުކާރުން ވަނީ ނިންމާފަ އެވެ. މިއީ ހަރަދު ކުޑަކުރުމާއި ހިންގުން ހަރުދަނާކޮށް ހިދުމަތް ރަނގަޅު ކުރުމުގެ ގޮތުން ގެންނަން ނިންމި ބަދަލެކެވެ.

މޯލްޑިވްސް އެއާޕޯޓްސް ކޮމްޕެނީން މިއަދު ބުނީ މީގެ ދެ ހަފްތާއެއްހަ ދުވަސްކުރީން ފެށިގެން އަތޮޅުތެރޭގައި ރީޖަނަލް އެއާޕޯޓްގެ ދަށުގައި ހުރި ހުރިހާ އެއާޕޯޓެއްގެ ހިންގުމާއި އެމްއޭސީއެލް އިން ހަވާލުވެފައިވާ ކަމަށެވެ. އެ ގޮތުން ޖުމްލަ ނުވަ އެއާޕޯޓެއްގެ ހިންގުން އެ ކުންފުނީގެ ބެލުމުގެ ދަށަށް ވަނީ ގެނެސްފަ އެވެ.

މި ނިންމުމާއެކު އެއާޕޯޓްތަކުގެ މަރާމާތު ކުރުމާއި ހިންގުން ހަރުދަނާކޮށް ހިދުމަތްތައް އިތުރަށް ރަނގަޅު ކުރާނެ ކަމަށް އެ ކުންފުނިން ވަނީ ބުނެފަ އެވެ.

ރީޖަނަލް އެއާޕޯޓްސްގެ ދަށުން ހިންގަމުން އައި ހުރިހާ އެއާޕޯޓަކާއި އެމްއޭސީއެލް އިން ހަވާލުވުމާ އެކު ސަރުކާރުން ކަނޑައަޅާފައިވާ ގޮތަށް ރީޖަނަލް އެއާޕޯޓްސް ކޮމްޕެނީ އުވާލުމުގެ މަސައްކަތް ވަނީ ފަށާފަ އެވެ. ނަމަވެސް އިދާރީ ހުރިހާ ކަމެއް ނިންމުމަށް ފަހު އެ ކުންފުނި އުވާލެވޭނެ ސީދާ ތާރީހެއް ނޭންގެ އެވެ.

އެ މަސައްކަތް ބާރަށް ކުރިއަށް ގެންދާނެ ކަމަށް ސަރުކާރުން ބުނެ އެވެ.

މިހާރުވެސް ބައެއް އެއާޕޯޓްތަކުގެ މަސައްކަތް ދަނީ ކުރިއަށެވެ. އަދި ބައެއް އެއާޕޯޓްތައް އެޅުމަށް ވަނީ ނިންމާފަ އެވެ. ބައެއް މަސައްކަތް ހަވާލުކޮށްފައި ވަނީވެސް އެމްއޭސީއެލްއަށެވެ. އެ ގޮތުން މަކުނުދޫ އެއާޕޯޓާއި މަތިވެރި އެއާޕޯޓް އަޅާނީ ވެސް އެމްއޭސީއެލް އިންނެވެ.