ފުވައްމުލަކު އެއާޕޯޓަށް ދިމާވި މައްސަލަ ހައްލުކޮށް އަލުން އޮޕަރޭޝަނަށް
ފަޔަރ ޓްރެކަށް ދިމާވި މައްސަލަ ހައްލުކޮށް މޯލްޑިވިއަނުން ފުވައްމުލައްސިޓީ އެއާޕޯޓަށް ދަތުރުތައް ފެށުމަށް ތައްޔާރުވެއްޖެއެވެ.
ވޮއިސްއަށް މައުލޫމާތު ހިއްސާކުރަމުން އައިލެންޑް އޭވިއޭޝަނުގެ މީޑިއާ އޮފިޝަލް ވިދާޅުވީ، ދިމާވި މައްސަލަ ހައްލުކޮށް މިއަދު އުދުހުންތައް ފެށުމަށް ތައްޔާރުވަމުންދާކަމަށެވެ. އެގޮތުން މިހާރު އެއާޕޯޓް ކުރީގެ ހާލަތަށް އައިސްފައިވާކަން އޭނާ ފާހަގަކުރެއްވިއެވެ.
ފުވައްމުލައް އެއާޕޯޓްގެ ދަރުތުތައް ވަގުތީގޮތުން ހުއްޓުމަކަށް އައިސްފައިވަނީ، އެއާޕޯޓް ފަޔަރ ޓްރަކަކަށް ދިމާވި މައްސަލައަކުންނެވެ. އެ މައްސަލަ ހައްލުކުރުމަށް ރޭގެ ވަގުތެއްގައި ވަނީ ފަޔަރ ޓްރަކެއް އެ އެއާޕޯޓަށް ގެންގޮސްފައެވެ.
ފުވައްމުލައް އެއާޕޯޓަށް ގެންދިޔަ ފަޔަރ ލޮރީ... ފޮޓޯ؛ އޭވިއޭޓާސް މޯލްޑިވްސް
ފުވައްމުލައް އެއާޕޯޓް މިހާތަނަށް ހިންގަމުން އައިސްފައިވަނީ ރީޖަނަލް އެއާޕޯޓުންނެވެ. މިދިޔަ އަހަރުތަކުގައި އެއާޕޯޓްގެ ބައެއް ތަކެއްޗަށް ބެލިފައިނެތުމުން ބައެއް ކަހަލަ އާލާތްތައް ބައުވެ މައްސަލަ ދިމާވެފައިހުރިކަން އެމްއޭސީއެލުން ވަނީ ފާހަގަކޮށްފައެވެ. ފުވައްމުލައް އެއާޕޯޓްގެ ބަލަދުވެރި ފަރާތަކީ މިހާރު އެމްއޭސީއެލްއެވެ.
ފުވައްމުލަކަކީ ލޯކަލް ޓޫރިޒަމް ވަރަށްބޮޑަށް ކުރިއަރަމުން އަންނަ ރަށެކެވެ. ފުވައްމުލައް އެއާޕޯޓް ފަޔަރ ޓްރަކަށް ކުއްލިއަކަށް ދިމާވި ކަމަކުން އެއާޕޯޓް ބަންދުވުމާއެކު އެ ސިޓީއަށް ފުރަންގޮސް ތިބި ދަތުރުވެރިންނާއި އަދި މާލެ އައުމަށް ދަތުރަށް ތައްޔާރުވަމުންދިޔަ ގިނަ އަދަދެއްގެ ބަޔަކު ނުފުރިފައި ތިއްބެވެ.
ކައިރި ހިސާބުތަކުން ލޯންޗުގައި ފުވައްމުލަކަށް ދަތުރުކޮށް އުޅުނު ނަމަވެސް، ދުރުހިސާބުތަކުން ފުވައްމުލަކަށް ދިއުމަށް ރައްޔިތުން ބޭނުންކުރަނީ މޯލްޑިވިއަންއެވެ. ފުވައްމުލައް އެއާޕޯޓަށް ހަމައެކަނި ދަތުރުތައް ބާއްވަނީވެސް މޯލްޑިވިއަނުންނެވެ.
Advertisement
This content is created and paid for by advertisers and does not involve Voice Journalists
