ހުޅުމާލޭގައި އެސްޓީއޯއިން ތަރައްޤީކުރި ސިޓީހޮޓާ އަގުކޮށް، އެތަން ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީއަށް ބަދަލުކުރުމުގެ މުއާމަލާތްތައް ނިންމާލައިފިއެވެ.
މިކަމާ ގުޅިގެން އެސްޓީއޯއިން ނެރުނު ބަޔާނުގައި ބުނެފައިވަނީ، ހުޅުމާލޭގައި ހުންނަ އެކުންފުނީގެ ހޮޓާ، އެޗްޑީސީއާއެކު 20 މިލިއަން ޔޫއެސް ޑޮލަރަށް އަގުކޮށް އެއްބަސްވުމަށްފަހު، ހުޅުމާލޭ ފޭސް ދޭއްގެ ބިމަކަށް ބަދަލުކުރުމުގެ އެއްބަސްވުމެއްގައި ސޮއިކޮށް ނިމިފައިވާކަމަށެވެ. އެސްޓީއޯ އާއި އެޗްޑީސީއާ ދެމެދު މި އެއްބަސްވުން ގާއިމްކޮށްފައިވަނީ، ހުސްވި އޮގަސްޓްމަހުގެ 31 ވަނަ ދުވަހެވެ.
އެސްޓީއޯއިން ބުނީ، މި މުޢާމަލާތާއި ގުޅިގެން އެ ކުންފުނީގެ ހިސާބުތަކަށް އައިސްފައިވާ ބަދަލުތަކުގެ ތަފްސީލު، 2025 ވަނަ އަހަރުގެ އެސްޓީއޯގެ މާލީ ބަޔާންތަކުގައި ހިމެނޭނެ ކަމަށެވެ. އެސްޓީއޯއިން މިކަން އިއުލާނުކޮށްފައިވަނީ، ކެޕިޓަލް މާކެޓް ޑިވަލޮޕްމަންޓް އޮތޯރިޓީގެ ކޮންޓިނުއިން ޑިސްކްލޯޝަރ އޮބްލިގޭޝަންސް އޮފް އިޝުއަރޒްގެ (ސީ.ޑީ.އޯ.އައި) ރެގިއުލޭޝަންގެ ދަށުންކަމަށް އެކުންފުނިން ބުނެއެވެ.
އެންމެފަހުން ބޭއްވި އެސްޓީއޯގެ އަހަރީ އާއްމު ޖަލްސާގައި އެކުންފުނީގެ މެނޭޖިން ޑިރެކްޓަރު ޝިމާދު އިބްރާހިމް ވަނީ، ސިޓީ ހޮޓަލުގެ ބަދަލުގައި ހުޅުމާލެއިން 40،000 އަކަފޫޓުގެ ބިމެއް ހަމަޖެހިފައިވާކަމަށް ވިދާޅުވެފައެވެ.
އެޗްޑީސީން މިފަހުން ވަނީ އެ ހޮޓާ ތަރައްޤީކުރުމުގެ މަސައްކަތް، ދުބާއީގެ ޑީޕްސީފުޑް ކޮމްޕެނީން ހަދާފައިވާ ވޯލްޑް އޮފް ބިޒްނަސް ޕްރައިވެޓް ލިމިޓެޑާ ހަވާލުކޮށްފައެވެ. ދުބާއީގެ ކުންފުނިން އެތަން ހިންގުމަށް ނިންމާފައިވަނީ، "މަންހަޓަން ގްރޭންޑު" ނަމުގައެވެ.
އެޗްޑީސީން ބުނީ، ފަސްތަރީގެ އެ ހޮޓާ ތަރައްޤީކުރުމަށް ނިންމާފައިވަނީ، ކުރިއަށްއޮތް 12 މަސްދުވަހުގެ ތެރޭގައި މަސައްކަތް މުޅިން ނިންމާގޮތަށެވެ. ފަސްތަރީގެ މި ހޮޓާ ނިމޭއިރު، 158 ކޮޓަރީގެ އިތުރުން ބެންކުއެޓް ހޯލަކާއި މަލްޓި ޕާރޕަސް ހޯލުގެ އިތުރުން ސްވިމިންގ ޕޫލާއި، އިންޓަރނޭޝަނަލް ފުޑް އެންޑް ބެވަރޭޖްގެ 4 ބްރޭންޑާއި ޖިމާއި ސްޕާގެ ޚިދުމަތުގެ އިތުރުން ސިޓީ ހޮޓަލަކުން ދޭ ހިދުމަތްތައް ލިބެން ހުންނާނޭކަމަށް އެ ކުންފުނިން ބުނެއެވެ.
އެޗްޑީސީން ވަނީ ހޮޓާ ނިމޭއިރު، އެތަން ވެގެންދާނީ ވެލާނާ އިންޓަރނޭޝަނަލް އެއާޕޯޓާ ގުޅާލެވޭނެ މުހިއްމު ހޮޓަލަކަށް ކަމަށެވެ. އެގޮތުން ހޮޓާ ހުޅުވާއިރު ބައިނަލްއަޤްވާމީ 12 އެއާލައިނަކާއެކު ވިޔަފާރީގެ އެއްބަސްވުންތައް ހަދާނޭކަމަށްވެސް ވަނީ ބުނެފައެވެ.
އެސްޓީއޯއިން ހުޅުމާލޭގައި ސިޓީ ހޮޓަލެއް ގާއިމްކުރުމުގެ މަސައްކަތް އެންމެފުރަތަމަ ފެށީ 2007 ވަނަ އަހަރެވެ. ތަފާތު އެކި އަހަރުތަކުގެ މަތިން ބަޔަކާ ހަވާލުކޮށްގެން އެތަނުގެ މަސައްކަތްތައް ފެށިނަމަވެސް ހޮޓަލުގެ މަސައްކަތް، އޮތީ ކުރިއަށް ނުގޮސް ހުއްޓިފައެވެ. އެގޮތަށް އޮއްވައި އެސްޓީއޯއިން ވަނީ 2024 ވަނަ އަހަރު އެ ހޮޓާ އެޗްޑީސީއާ ހަވާލުކޮށްފައެވެ.
Advertisement
This content is created and paid for by advertisers and does not involve Voice Journalists
