ރީޖަނަލް އެއާޕޯޓްސްގެ ދަށުން މީގެ ކުރިން ހިންގި 9 އެއާޕޯޓުގެ ޙާލަތު ދެނެގަނެ، އެ އެއާޕޯޓުތަކުގެ ޚިދުމަތްތައް ހަރުދަނާ ކުރުމުގެ މަސައްކަތް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ފަށައިފިއެވެ.
ރީޖަނަލް އެއާޕޯޓްސް ކުންފުނި އުވާލަން މިދިޔަ އަހަރުގެ ސެޕްޓެމްބަރު މަހު ސަރުކާރުން ވަނީ ނިންމާފައެވެ. ޚަރަދުތައް ކުޑަކުރުމަށް ސަރުކާރުން ނިންމި އެ ނިންމުމާއެކު އާރުއޭސީއެލް އިން ހިންގަމުން އައި ނުވަ އެއާޕޯޓެއްގެ އޮޕަރޭޝަނާއި އެމްއޭސީއެލް އިން ވަނީ މިދިޔަ މަހުގެ ތެރޭގައި ހަވާލުވެފައެވެ.
އެކަމާ ގުޅިގެން އެމްއޭސީއެލް އިން މިއަދު ބުނީ، އެމްއޭސީއެލްގެ ޓެކްނިކަލް ޓީމުތަކާއި އިސްވެރިން އެ އެއާޕޯޓުތަކަށް ޒިޔާރަތްކޮށް، އެ އެއާޕޯޓްތަކުގެ ހާލަތު ބަލައި ދެނެގަނެ, ޚިދުމަތްތައް ހަރުދަނާކުރުމަށް ކުރަންޖެހޭ ކަންކަން ކުރާނެ ކަމަށެވެ.
އެގޮތުން އެ ޓީމުތަކުން ހުސްވި ހަފުތާގައި ފުވައްމުލަކު އެއާޕޯޓަށް ޒިޔާރަތްކޮށް، އެތަނުގެ ޙާލަތު ބަލާފައެވެ. އެ އެއާޕޯޓަށް އެމްއޭސީއެލްގެ ޓީމުތަކުން ދިޔައިރު، އެ އެއާޕޯޓުގެ ފަޔާ ޓްރަކުގެ ހޮޅި ފަޅައިގެން ގޮސް، އެއާޕޯޓު އޮތީ ވަގުތީ ގޮތުން ބަންދުކޮށްފައެވެ.
އެ އެއާޕޯޓުގެ ޚިދުމަތްތައް އަލުން ފަށާފައިވަނީ އައްޑޫން އައު ފަޔާ ލޮރީއެއް ފުވައްމުލަކަށް ގެންގޮސް، އެއާޕޯޓު ބަންދުކުރިތާ ގާތްގަޑަކަށް ދެ ދުވަސް ފަހުންނެވެ.
Advertisement
This content is created and paid for by advertisers and does not involve Voice Journalists
