ޤައުމީ ތަރައްޤީގެ ޕްލޭން އެކަށައެޅުމުގައި ބައިވެރިނުވާން އިދިކޮޅު މައި ޕާޓީ އެމްޑީޕީން ނިންމުމުން، އެ ޕްލޭނުގައި އެންމެންގެ ބައިވެރިވުމާއި ޚިޔާލު ނުދޭނަމަ، އެ މަސައްކަތަށް ހީނަރުކަން އަންނާނެ ކަމަށް އެ ޕްލޭނުގެ މަސައްކަތް ހަވާލުކޮށްފައިވާ ނެކްސިއާ މޯލްޑިވްސް އިން ބުނެފިއެވެ.

ދައުލަތުގެ މީޑިޔާގެ ޕްރޮގްރާމެއްގައި ވާހަކަފުޅު ދައްކަވަމުން ސަރުކާރުގެ ފަރާތުން އެ މަސައްކަތް ހަވާލުކޮށްފައިވާ ނެކްސިއާ މޯލްޑިވްސްގެ މެނޭޖިން ޑިރެކްޓަރު އަދި ނޭޝަނަލް ޑިވެލޮޕްމަންޓް ފޯމިއުލޭޝަން ޕްލޭން ޕްރޮޖެކްޓުގެ ލީޑަރު ޙާމިދު ސާދިޤު ވިދާޅުވީ، ދުރު މުސްތަޤުބަލެއްގެ ޕްލޭނެއް އޮތުމަކީ ކޮންމެ ބަޔަކު ވެސް ކުރާ މަސައްކަތެއްގައި ވަކި ދިމާލަކަށް ވާސިލުވުމަށް ނުހަނު މުހިންމު ކަމެއް ކަމަށެވެ.

އެހެންކަމުން ޤައުމީ ތަރައްގީގެ އެފަދަ ޕްލޭނެއްގައި ވީހާ ވެސް ގިނަ ފަރާތްތަކުން ބައިވެރިވެ، ކޮމެންޓުތައް ދިނުމަކީ ރަނގަޅު ޕްލޭނެއް އެކުލަވައިލަން ލިބޭ މުހިންމު ފުރުސަތެއް ކަމަށާއި، އެއްވެސް ފަރާތަކުން އެފަދަ ޕްލޭނެއްގައި ބައިވެރިނުވުމަކީ އެ ޕްލޭނަށް ހީނަރުކަން އަންނާނެ ކަމެއް ކަމަށެވެ.

ހާމިދު އެފަދައިން ވިދާޅުވިއިރު، އަލަށް އެކުލަވާ ތަރައްގީގެ ޕްލޭނަށް އަމަލުކުރާނެ ކަމުގެ ޔަގީންކަމެއް ނެތް ކަމަށް ބުނެ، އެކަމުގައި ބައިވެރިނުވާން އެމްޑީޕީން ވަނީ ނިންމާފައެވެ.

އެގޮތުން އެމްޑީޕީން އިއްޔެ ނެރުނު ނޫސްބަޔާނެއްގައި ބުނީ، ސަރުކާރުން އެ މަސައްކަތް ހަވާލުކޮށްފައިވާ ނެކްސިއާ އިން އެ ޕާޓީއާ ބައްދަލުކުރަން އެދިފައިވާ ކަމަށާއި، އެކަމާ ގުޅިގެން އެ ކުންފުންޏަށް އެ ޕާޓީން ޖަވާބު ދީފައިވާ ކަމަށެވެ.

އެމްޑީޕީން ބުނީ، ދުރު ރާސްތާއަށް އަމާޒުކޮށް އެކުލަވައިލާ ގައުމީ ތަރައްގީގެ ޕްލޭނެއް އޮތުމަކީ މުހިންމު ކަމެއްކަން ގަބޫލުކުރި ނަމަވެސް، ގައުމީ ތަރައްގީގެ ޕްލޭނެއް އެކުލަވާލުމުގެ ނަމުގައި ސަރުކާރުން މިހާރު ކަންކަން ކުރަމުންދާ ގޮތާމެދު ކަންބޮޑުވާ ކަމަށެވެ.

އެގޮތުން އެމްޑީޕީން ބުނި ގޮތުގައި، އެ ޕްލޭން ކުރިޔަށް އޮތް 20 އަހަރަށް އެކުލަވާލި ނަމަވެސް، އެ ނިންމުން ނިންމީ ކިހިނެއް ކަމެއް އަދި އެ ނިންމުމުގައި މަޝްވަރާ ކުރަނީ ކޮން ބަޔަކާކަމެއް އެނގެން ނެތެވެ. އަދި އެ ޕްލޭން އެކުލަވާލި ނަމަވެސް އެއްވެސް ޕްލޭނެއް ނެތި ސަރުކާރުން ބައެއް ޢުމްރާނީ މަޝްރޫއުތައް އިއުލާންކޮށް، އަލަށް މަސައްކަތް ފަށާފައިވާ ކަމަށް ވެސް އެމްޑީޕީން ބުންޏެވެ. 

އެހެންކަމުން އެފަދަ ޕްލޭނެއް އެކުލަވާލުމުގެ ބޭނުމެއް މިހާރު އޮތް ކަމަށް ނުދެކޭ ކަމަށާއި، އެކަމުގައި ސަރުކާރުގެ ނިޔަތް ހެޔޮ ކަމަށް ވެސް ނުދެކޭ ކަމަށް އެމްޑީޕީން ވަނީ ބުނެފައެވެ.

"ވިލުންތެރި ރާއްޖެ 2045"ގެ ނަމުގައި ޤައުމީ ތަރައްގީގެ ޕްލޭން އެކުލަވާލުމުގެ މަސައްކަތް ސަރުކާރުގެ ފަރާތުން ނެކްސިއާ މޯލްޑިވްސްއާ ހަވާލުކުރީ 17.9 މިލިއަން ރުފިޔާއަށެވެ.