އައްޑޫ ސިޓީގެ މަރަދޫ ފޭދޫއަށް ނަގޫ ރޯޅިއެއް އަރައި، ގަދަ ވަޔާއެކު ހަ ގެއެއްގެ ފުރާޅު އެއްލާލައިފިއެވެ.

އައްޑޫ ސިޓީގެ ކައުންސިލް މެންބަރު ޚާލިދާ މުޙައްމަދު "ވޮއިސް" އަށް ވިދާޅުވީ، ގަދަ ވަޔާއެކު މަރަދޫ ފޭދޫގެ ބައެއް ގެތަކަށް ގެއްލުން ލިބުނީ މިއަދު ހެނދުނު 08:40 އާއި 09:00 އާ ދެމެދުގެ ވަގުތެއްގައި އައި ބާރު ވަޔާއެކު ކަމަށެވެ.

އެގޮތުން އެއް ގެއަކަށް ވަރަށް ބޮޑަށް ގެއްލުން ލިބިފައިވާއިރު، އެ ރަށުގެ ހިނަވާ ގޭގެ ފުރާޅު ވެސް ވަޔާއެކު އެއްލާލައިފައިވާ ކަމަށް ޚާލިދާ ވިދާޅުވިއެވެ. އަދި ބައެއް ގެތަކުގެ ވަށާ ފާރު ވެސް ވެއްޓިފައިވާ ކަމަށް ވެސް ޚާލިދާ ވިދާޅުވިއެވެ.

ޚާލިދާ ވިދާޅުވީ، އެމްއެންޑީއެފް އާއި ރަށުގެ މުއައްސަސާތަކާއި ކައުންސިލު ގުޅިގެން ލިބިފައިވާ ގެއްލުންތައް ބަލައި އެސެސްމެންޓް ހެދުމުގެ މަސައްކަތް މިހާރު ކުރަމުންދާ ކަމަށެވެ. ނަމަވެސް އަދި އެއްވެސް ބަޔަކަށް ވަގުތީ ބޯހިޔާވަހިކަން ފޯރުކޮށްދޭން ޖެހޭ ފަދަ ޙާލަތެއް ދިމާވެފައިނުވާ ކަމަށް ޚާލިދާ ވިދާޅުވިއެވެ.

އަދި ލިބިފައިވާ މުޅި ގެއްލުންތައް ދެނެގަނެވޭނީ އެސެސްމެންޓް ހަދައި ނިމުމުން ކަމަށް ވެސް ޚާލިދާ ވިދާޅުވިއެވެ.