ފަހި ދިރިއުޅުން ކޯޕަރޭޝަން (އެފްޑީސީ)އިން ހުޅުމާލޭގައި ޢިމާރަތްކުރަމުން އަންނަ ގެދޮރުވެރިޔާގެ ނިމިފައިވާ ފްލެޓުތަކަށް މި ހަފުތާގެ ތެރޭގައި ޙައްޤުވެރިންނަށް ވަދެވޭނެ ކަމަށް އެ ކުންފުނިން މިއަދު ބުނެފިއެވެ.

މިދިޔަ ސަރުކާރުން ތަރައްގީ ކުރަން ފެށި 4،000 ފްލެޓްތަކުގެ ތެރެއިން ބޮޑު ބައެއްގެ މަސައްކަތް މިހާރު ވަނީ ނިމިފައެވެ. އެ ފްލެޓްތައް ލިބޭ ފަރާތްތަކުގެ ތެރެއިން 3،032 މީހަކާ އެކު އެއްބަސްވުންތަކުގައި ވެސް މިހާތަނަށް ވަނީ ސޮއިކޮށްފައެވެ.

އެކަމާ ގުޅޭ ގޮތުން އެފްޑީސީން މިއަދު ބުނީ، މި ހަފުތާ ނިމެންވާއިރަށް އޭގެ ތެރެއިން ނިމިފައިވާ ފްލެޓުތަކަށް ޢާންމުންނަށް ވަނުމަށް ތަޅުދަނޑިތައް ހަވާލުކުރުމުގެ މަސައްކަތް ކުރަމުންދާ ކަމަށެވެ. އެގޮތުން ފްލެޓްތަކުގެ އެއްބަސްވުންތައް ހަދައި ނިމިފައިވާ ބައެއް މީހުންނަށް މިހާރު، އެކުންފުނީގެ ޕޯޓަލް މެދުވެރިކޮށް ސެކިއުރިޓީ ޑެޕޮސިޓުގެ ގޮތުގައި ދައްކަން ޖެހޭ އަދަދު ދެއްކުމުގެ ފުރުސަތު ވެސް ފްލެޓްތައް ނިމިފައިވާ ތަރުތީބުން މިހާރު ހުޅުވާލެވިފައިވާ ކަމަށް ވެސް އެ ކުންފުނިން ބުންޏެވެ.

ގެދޮރުވެރިޔާގެ ދަށުން ޢިމާރަތްކުރަމުން އަންނަ ފްލެޓްތައް ޢިމާރަތްކުރަނީ އިންޑިޔާގެ ދެ ކުންފުންޏަކުންނެވެ. އެ ފްލެޓްތަކުގައި ދެ ކޮޓަރީގެ އެޕާޓްމެންޓްތަކާއި ތިން ކޮޓަރީގެ އެޕާޓްމެންޓުތައް ހުންނައިރު، ދެ ކޮޓަރީގެ އެޕާޓްމަންޓުތައް ދޫކުރަނީ 7،000 ރުފިޔާއަށެވެ. އެ ތަންތަނުގެ މެއިންޓެނަންސް ފީގެ ގޮތުގައި 1،000 ރުފިޔާ ނަގާއިރު، ސެކިއުރިޓީ ޑިޕޮސިޓުގެ ގޮތުގައި ދައްކަން 15،000ރ. ދައްކަން ޖެހެއެވެ.

އަދި ތިން ކޮޓަރީގެ އެޕާޓްމެންޓުތައް 9،500 ރުފިޔާއަށް ދޫކުރާއިރު، މެއިންޓެނެންސް ފީގެ ގޮތުގައި 1،5000 ރުފިޔާ އަދި ސެކިއުރޓީ ޑެޕޮސިޓްގެ ގޮތުގައި 25،000 ރުފިޔާ ދައްކަން ޖެހެއެވެ.