އިދިކޮޅު މައި ޕާޓީ، އެމްޑީޕީގެ މަޖިލީހުގެ މެންބަރުން މާލީ ވަޒީރު މޫސާ ޒަމީރުއާ ބައްދަލުކުރަން ފިނޭންސް މިނިސްޓްރީ ހުންނަ އިމާރާތަށް ވަޑައިގެންނެވިއިރު، ވަޒީރު ޒަމީރު ރާއްޖޭގައި ނެތްކަން އެނގިއްޖެއެވެ.
ރާއްޖޭގެ މާލީ ޙާލަތާ ގުޅިގެން ސަރުކާރުން ޙާލަތު އޮތް ގޮތް ބަޔާންނުކޮށް ސިއްރު ކުރާ ކަމަށް ބުނެ މިއަދު ހެނދުނުން ފެށިގެން އެމްޑީޕީން އަންނަނީ މާލީ ވުޒާރާގެ ކުރިމަތީގައި މުޒާހަރާ ކުރަމުންނެވެ. އެ މުޒާހަރާގެ ތެރެއިން އެމްޑީޕީގެ ޕީޖީ މެންބަރުން ވަޒީރާ ބައްދަލުކުރައްވަން އެ ވުޒާރާއަށް ވަދެވަޑައިގަންނަވަން އުޅުއްވުމުން ފުލުހުން ވަނީ އެކަމަށް ހުރަސް އަޅާފައެވެ. އެއާއެކު އެ މުޒާހަރާ ހޫނުވިއެވެ.
އެހެން ނަމަވެސް އެމްޑީޕީގެ މެންބަރުން ވަނީ ފުލުހުންގެ ސަފު ފޫއަޅުވާލައި، ގަދަކަމުން އެ ވުޒާރާގެ ތެރެއަށް ވަދެވަޑައިގަންނަވައިފައެވެ.
އެހެން ނަމަވެސް އެނގިފައިވާ ގޮތުގައި ވަޒީރު މޫސާ ޒަމީރު މިވަގުތު ރާއްޖެއަކު ނޫޅުއްވައެވެ.
އެމްޑީޕީން މާލީ ވަޒީރާ ބައްދަލުކުރަން ބޭނުންވަނީ ޑޮލަރުގެ އަގު ބޮޑުވުމާއި ސަރުކާރުން ވިޔަފާރިތަކަށް ދޭންޖެހޭ ފައިސާތައް ނުދޭތީ ކަމަށް އެ މެންބަރުން ވިދާޅުވެއެވެ. އަދި ތަކެތީގެ އަގު ބޮޑުވެ، ރާއްޖޭގެ އިޤްތިސާދީ ޙާލަތު ސަރުކާރުން ހާމަނުކުރާތީ ވެސް ކަންބޮޑުވާ ކަމަށް އެ މެންބަރުން ވަނީ ވިދާޅުވެފައެވެ.
އެމްޑީޕީ މެމްބަރުން މީގެ ކުރިންވަނީ ހަމަ މިގޮތަށް މަރުކަޒީ ބޭންކްގެ ގަވަރުނަރާ ބައްދަލުކުރަން އެމްއެމްއޭ އިމާރާތަށްވެސް ޒިޔާރަތްކޮށްފައެވެ.
އެކަމާ ގުޅިގެން މާލީ ވަޒީރާ ސުވާލުކުރުމަށް ރަސްމީކޮށް އެދިފައިވާ ކަމަށް އެ މެންބަރުން ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
