ޔަހޫދީ ނިރުބަވެރި ދައުލަތް، އިޒްރޭލުން ޣައްޒާއަށް ދެމުންދާ ލާއިންސާނީ އަނިޔާތަކާ ދެކޮޅަށް ހަރުއަޑުކޮށް ވަކާލާތުކޮށް، މިހާރު ޣައްޒާއަށް މިސްރާބު ޖަހާފައިވާ "ގްލޯބަލް ސުމޫދް ފްލޮޓިއްލާ"ގެ ބޯޓުތައް ތޫނިސްގައި އޮއްވައި، އޭގެ ތެރެއިން މައި އެއްބޯޓަށް ބަޔަކު ޑްރޯން ޙަމަލާއެއް ދީފިއެވެ.

ރާއްޖޭގެ ފަރާތުން އެ ހަރަކާތުގައި އިސްކޮށް ހަރަކާތްތެރިވާ އިންޓަނޭޝަނަލް އެއިޑް ކެމްޕެއިން (އައިއޭސީ)ގެ ޑިރެކްޓާ އޮފް އިންޓަނޭޝަނަލް ރިލޭޝަންސް، މުޙައްމަދު އަލީ ވިދާޅުވި ގޮތުގައި ޑްރޯން ޙަމަލާ އަމާޒުވެފައިވަނީ އެ ހަރަކާތުގެ އެންމެ މައި އެއް ބޯޓު ކަމުގައިވާ "ފެމީލިއާ" ނަމަކަށް ކިޔާ ބޯޓަކަށެވެ.

މުޙައްމަދު ވިދާޅުވި ގޮތުގައި އެންމެ ފުރަތަމަ އެ ބޯޓުގައި ހިނގީ އަލިފާނުގެ ޙާދިސާއެއް ކަމުގައި ބެލެވުނު ނަމަވެސް، ފަހުން އެއީ ޑްރޯން ޙަމަލާއެއްކަން ކަށަވަރުކުރެވިފައިވާ ކަމަށެވެ. އެހެން ނަމަވެސް އެންމެންގެ ޙާލު ވެސް ރަނގަޅުކަމަށާއި، އެއްވެސް މީހަކަށް އަނިޔާއެއް ވެފައިނުވާ ކަމަށް މުޙައްމަދު ވިދާޅުވިއެވެ.

އަދި އެ ޙަމަލާ އަކީ އެ ހަރަކާތަށް ބިރު ދެއްކުމުގެ ގޮތުން ބަޔަކު ދިން ޙަމަލާއެއްގެ ގޮތުގައި މުޙައްމަދު ވަނީ ސިފަކޮށްފައެވެ.

"ގްލޯބަލް ސުމޫދް ފްލޮޓިއްލާ"ގެ ބޯޓުތައް އެންމެ ފުރަތަމަ ފުރާފައިވަނީ ސްޕެއިންގެ ބާސެލޯނާއިންނެވެ. އެއަށް ފަހު އެ ބޯޓުތައް ތޫނިސްގައި ބަނދަރުކުރުމަށްފަހު، އިތުރު ބައެއް ބޯޓުތަކާއެކު ޣައްޒާއަށް މިސްރާބު ޖެހުމަށް ހަމަޖެހިފައިވެއެވެ. 

އެ ހަރަކާތުގައި ބައިވެރިވާ ފަރާތްތަކަކީ ޓެރަރިސްޓުންތަކެއް ކަމަށް ޔަހޫދީ ނިރުބަވެރި ދައުލަތުގެ ވެރިން ވަނީ ސިފަކޮށްފައެވެ. އަދި އެ ހަރަކާތުގެ ބައިވެރިން ޣައްޒާއަށް ވާސިލްނުވެވޭނެ ކަމުގެ އިންޒާރު ވެސް އިޒްރޭލުން މީގެ ކުރިން ވަނީ ދީފައެވެ.