ރައީސުލްޖުމްހޫރިއްޔާގެ ދެކަނބަލުންނާއި ގުޅޭގޮތުން ހަގީގަތާއި ހިލާފު ދޮގު ވާހަކަތަކެއް ދެއްކިފައިވާ ކަމަށް ވިދާޅުވެ ޕީއެންއެފް ގައި އިސްކޮށް ހަރަކާތްތެރިވާ އަހުމަދު މުހައްމަދު ވަހީދު ( ވައްޑެ) ރައީސްގެ ދެކަނބަލުންގެ އަރިހުން މާފަށް އެދިއްޖެ އެވެ.

އޭނާާ ވަނީ އެކަން ހާމަކޮށް އެކްސްގައި ޕޯސްޓެއް ކޮށްފަ އެވެ. ރައީސްގެ ދެކަނބަލުންގެ ފޮޓޯއަކާއެކު ވަހީދު ކުރި ޕޯސްޓެއްގައި ވިދާޅުވީ ތިމާއަށް ގޯހެއް ހެދިއްޖެކަން އިހްސާސް ކުރެވޭ ހާލަތުގައި އެފަދަ ގޯސްތައް ރަނގަޅު ކުރުމާއި، އެފަދަ ގޯހެއްގައި އެހެން މީހެއްގެ ހައްގަކަށް އުނިކަން ލިބިދާނެފަދަ އަމަލެއް ހިމެނޭނަމަ ވަގުތު ފާއިތު ނުވަނީސް އެފަދަ ފަރާތްތަކުގެ ކިބައިން މައާފަށް އެދުމަކީ މީހާގެ ނިކަމެތިކަމެއް ނޫން ކަމަށެވެ.

އަދި އެއީ ގައުމުގެ އިޖުތިމާއީ ފޭރާން ހިފެހެއްޓުމުގައި ފަރުދީގޮތުން އަދާ ކުރެވޭނެ އެންމެ ކުޑަ މިންވަރު ކަމަށް އޭނާ ވިދާޅުވި އެވެ.

ވަހީދު ވަނީ ސިޔާސީ އެކި މަހައްލުތަކުގައި ރައީސުލް ޖުމްހޫރިއްޔާ ޑރ. މުހައްމަދު މުޢިއްޒު އާއި ފަސްޓްލޭޑީ ސާޖިދާ މުހައްމަދާއި ގުޅުވައި އޭނާއަށް ދެއްކިފައިހުރި ވާހަކަތަކާއިމެދު މިއަދު ހިތާމަކުރާ ކަމަށް ވިދާޅުވެފަ އެވެ. އަދި ރައީސްގެ ދެކަނބަލުންނާއި އާއިލާގެ ކިބައިން އެދެނީ ދީލަތި މައާފަކަށް ކަމަށް ވިދާޅުވި އެވެ.

"ސިޔާސީ ޖޯޝު ހުންނަ މީހެއްގެ ހައިސިއްޔަތުން އަޅުގަނޑު އެފަދަ ވާހަކަތައް ދެއްކީ އަޅުގަނޑަށް އޭރު ލިބުނު މައުލޫމާތުތަކަކަށް ބިނާކޮށް ކަމުަގައި ވީނަމަވެސް، މިހާރު އަޅުގަނޑަށް ކަށަވަރު ކުރެވިފައިވަނީ އެއީ ހަގީގަތާއި މުޅިން ހިލާފު މައުލޫމާތުތަކެއްކަން, އޭނާ ވިދާޅުވި އެވެ.

އަދި ވިދާޅުވީ ސިޔާސީ ދާއިރާއަށް ކިތަންމެ ޝައުޤެއް ހުއްޓަސް، އަނެކާގެ އަބުރު ގަސްތުގައި ނަގާލުމާއި ފިތުނަ ފަސާދަ އުފެއްދުމަކީ އޭނާ މިހާރު ނަފްރަތު ކުރާކަމެއް ކަމަށެވެ.

"އަޅުގަނޑު ހިމެނޭހެން އަޅުގަނޑުގެ އިލްތިމާސަކީ ސިޔާސީ މައިދާނުގައި ޙަރަކާތްތެރިވާ ހުރިހާ ފަރާތަކުންވެސް މި ގައުމުގެ މައްސަލަތަކަށް ފޯކަސް ކުރައްވައި، ހަސަދަވެރިކަމުގައި މީހުންނަށް ޓާގެޓްކުރުން ހުއްޓާލުމަށް. އަޅުގަނޑުމެންނަށް ކުރިއެރުމެއް އޮތީ އޭރުން," ރައީސް ޔާމީންގެ އެންމެ އަރިހުގައި ހުރި ވަހީދު ކުރި ޕޯސްޓްގައި ވިދާޅުވެފައިވެ އެވެ.