އެޕަލްގެ އައިފޯނު 17 އާއި އެކު އެންމެ ފަހުގެ އުފެއްދުންތައް މާކެޓަށް ދައްކާލައިފިއެވެ. 

އެޕަލް އިން ރޭ ބޭއްވި ޚާއްސަ އިވެންޓުގައި ވަނީ އެޕަލްގެ ތަފާތު އައު އުފެއްދުންތައް މާކެޓަށް ދައްކާލައި، ޕްރީ އޯޑަރަށް ހުޅުވާލާފައެވެ. އެގޮތުން އައިފޯނުގެ ހަތަރު ވައްތަރެއް ނެރެފައިވެއެވެ. އެއީ:

- އައިފޯނު 17، އަގު ފެށެނީ 799 އެމެރިކާ ޑޮލަރުން

- އައިފޯނު އެއާ، އަގު ފެށެނީ 999 އެމެރިކާ ޑޮލަރުން

- އައިފޯނު 17 ޕްރޯ، އަގު ފެށެނީ 1099 އެމެރިކާ ޑޮލަރުން

- އައިފޯނު 17 ޕްރޯ މެކްސް، އަގު ފެށެނީ 1199 އެމެރިކާ ޑޮލަރުން

މި ފޯނުތަކުގެ ތެރެއިން އެޕަލްގެ ރޭގެ އިވެންޓުގައި އެންމެ ޚާއްސަކަމެއް ދީފައިވަނީ އައިފޯނު ޕްރޯއަށެވެ. އެއީ އެޕަލް އިން ބުނި ގޮތުގައި އެކުންފުނިން މިހާތަނަށް ބާޒާރަށް ނެރުނު އެންމެ ބާރުގަދަ ފޯނެވެ. އެގޮތުން އައިފޯނު ޕްރޯ ތަފާތު ތިން ކުލައަކުން ނެރެފައިވާއިރު އޭގެ ތެރޭގައި ހިމެނެނީ އޮރެންޖު، ގަދަ ނޫ އަދި އަޅި ކުލައެވެ.

އައިފޯނު އެއާގެ އައު ޑިޒައިން

މީގެ އިތުރުން އައިފޯން އެއާ ނެރެފައިވަނީ މުޅިން އައު ތަފާތު ޑިޒައިނެއްގައެވެ. 

އަދި އެޕަލް އިން ރޭ ވަނީ އިތުރު ތަފާތު އުފެއްދުންތަކެއް ވެސް ނެރެފައެވެ. އޭގެ ތެރޭގައި މުޅިން ތަފާތު އައު ފީޗާތަކާއި، އެތްލީޓުންނަށް ވެސް ޚާއްސަކޮށް ބޭނުންކުރެވޭ ގޮތަށް ނެރުނު އެއާޕޮޑްސް 3 އަދި އެންމެ ޒަމާނީ ފީޗާސް ތަކާއެކު ނެރުނު އެޕަލް ވޮޗް ސީރީޒް 11، އެޕަލް ވޮޗް އެސްއީ 3 އަދި އެޕަލް ވޮޗް އަލްޓްރާ 3އެކެވެ.

އައިފޯން ވޮޗް ސީރީޒްގެ އައު ގަޑިތައް

އެޕަލްއިން ބުނާ ގޮތުގައި، ސީރީސް 11 ގެ ބެޓެރީ 24 ގަޑިއިރާ ހަމައަށް ދެމިހުންނާނެއެވެ. މި ގަޑިތައް ރީސައިކަލްކޮށްފައިވާ އެލުމިނިއަމް އަދި ޕޮލިޝްކޮށްފައިވާ ޓައިޓޭނިއަމް ފިނިޝްގައި ލިބެން ހުންނާނެއެވެ. މީގައި އައިއަން-އެކްސް ބިއްލޫރިވެސް ހިމެނެއެވެ. މި ބިއްލޫރީގައި އެޓޮމިކް ލެވެލްގައި ބަންޑުކޮށްފައިވާ ސެރަމިކް ކޯޓިންއެއް ހިމެނޭތީ، ކުރީގެ ބިއްލޫރިއާ އަޅާބަލާއިރު ދެގުނައަށް ސްކްރެޗް ނުވާނެ ކަމަށް އެޕަލް އިން ބުނެއެވެ.