ޤައުމީ ހޭންޑްބޯލްޓީމުން ބާކީކުރިގޮތާމެދު ހިތާމަކުރާކަމަށް މިދިޔަ އަހަރު ހޭންޑް ބޯޅައިގެ މުޅުކުޅުންތެރިޔާގެ މަގާމް ހޯދި މުހައްމަދު ޔަޝްމު ބުނެފިއެވެ.
ހޭންޑްބޯލްޓީމުން ބާކީކުރި މައްސަލާގައި ޔަޝްމު ނެރުނު ބަޔާނުގައި ބުނެފައިވަނީ، މެލޭޝިއާގައި ތަމްރީނުތަކުގައި އުޅެފައި މާލެ އައިފަހުން ޓީމުން އެކަހެރިކޮސްފައިވާކަމަށެވެ. ޔަޝްމު ބުނީ މާލެ އައުމަށްފަހު ފަރިތަކުރުންތަކުގައި ބައިވެރިވުމަށް ޓީމުގެ ފަރާތުން އެއްވެސް ކަހަލަ އިޝާރާތެއް ލިބިފައި ނުވާކަމަށެވެ. ޔަޝްމު ބުނީ ޓީމުން ބާކީކުރިއިރު އޭނާ ދިޔައީ މެލޭޝިއާގައި ތަމްރީނުތައް ފުރިހަމަކުރަމުން ކަމަށާއި، މިއީ ހޭންޑް ބޯޅާގައި ރާއްޖޭގެ ކުޅުންތެރިއަކަށް ލިބުނު މިފަދަ ފުރަތަމަ ތަޖުރިބާ ކަމަށެވެ.
ޔަޝްމު ބުނީ މެލޭޝިޔާގައި ކުރި 2.5 މަސް ދުވަހުގެ ތަމްރީންތަކުގައި ހާޒިރުވި ރެކޯޑްތައް ހޭންޑްބޯލް މޯލްޑިވްސްގެ ރައީސާ ހިއްސާކޮށްފައިވެސް ވާނޭކަމަށެވެ. އެގޮތުން އެ މުއްދަތުގެ ތެރޭގައި، ހޭންޑްބޯލް އެސޯސިއޭޝަނުން އޭނާގެ ހާޒިރީ ރަނގަޅުވުމުގެ ސަބަބުން ދެމަސްދުވަހުގެ ގައުމީ ޓީމުގެ މުސާރަވެސް ދީފައިވާކަން ފާހަގަކުރިއެވެ.
މާލެއަށް އައިތާ މާގިނަ އިރެއް ނުވެ، އެސޯސިއޭޝަނުން އަހަންނަށް ގުޅައި، ބުނީ ޓެސްޓަކަށް އައުމަށް. އަހަރެން ދަތުރުކޮށްފައި އައިތާ މާގިނަ އިރެއް ނުވާތީ، އެވަގުތު ޓެސްޓެއް ހަދަން ދާން އަހަންނަށް ފަސޭހައެއް ނޫން. އެދުވަހުން ފެށިގެން، އަހަރެން ގައުމީ ޓީމުން ވަކިކުރި ސަބަބާ ބެހޭގޮތުން ތަފާތު ވާހަކަތައް ވަނީ އަޑުއިވިފައި
ޔަޝްމު ބުންޏެވެ.
ޔަޝްމު ބުނީ ބައެއް ކޯޗުންގެ ފަރާތުން އަޑުއިވުނު ގޮތުގައި އޭނާ ޓީމުން ބާކީކުރީ ޓެސްޓަށް ނުދިއުމުންކަމަށާއި، އަނެއްބައި ކޯޗުންގެ ނަޒަރުގައި ވަކިކުރީ އެހެން ސަބަބުތަކެއް ހުރުމުން ކަމަށެވެ.
ޔަޝްމު ބުނީ މިއީ ލިބިގެންދިޔަ ވަރަށްބޮޑު ހިތާމައެއް ކަމަށާއި، ކޮންމެ ތަނެއްގައި ކުޅުނު ކަމުގައި ވިޔަސް، ދިވެހި ހޭންޑްބޯޅަ ކުރިއެރުވުމަށްޓަކައި ބުރަ މަސައްކަތްކުރުމަށް އަބަދުވެސް ތައްޔާރަށް ހުރިކަމަށެވެ.
މި މައްސަލާގައި ހޭންޑްބޯލްގެ ރައީސް އަހުމަދު މުޖުތަބާ (މުޖޭ) ބައެއް މީޑިއާތަކުގައި ވިދާޅުވެފައިވަނީ، މިކަމާ ގުޅޭގޮތުން މައުލޫމާތު ސާފުކޮށްދިނުމަށް ވަރަށް އަވަހަށް ބަޔާނެއް ނެރޭނޭކަމަށެވެ.
Advertisement
This content is created and paid for by advertisers and does not involve Voice Journalists
