ސްޕެނިޝް ލަލީގާގެ މިދިޔަ އަހަރުގެ ޗެމްޕިއަން ބާސެލޯނާއިން، ވެލެންސިއާ 0-6 ގެ ބޮޑު ތަފާތަކުން ބަލިކޮށްފިއެވެ.

އަމިއްލަ ދަނޑުގައި ބާސެލޯނާއިން ކުޅުނު ފުރަތަމަ މެޗުގެ ދެވަނަ ހާފުގައި ބާސާއިން ވަނީ މޮޅުކުޅުމެއް ދައްކައިފައެވެ. އޭގެ ނަތީއްޖާއެއްގެ ގޮތުން މެޗުގައި ބާސާއިން ޖެހި ހަ ލަނޑުގެ ތެރެއިން ފަސް ލަނޑު އެ ޓީމުން ޖަހައިފައިވަނީ ދެވަނަ ހާފުގައެވެ.

ބާސާގެ ޒުވާން އަދި އެ ޓީމުގެ އެންމެ މުހިންމު ކުޅުންތެރިޔާ ކަމުގައިވާ ލަމީން ޔަމާލް އަށް ކުރިމަތިވި އަނިޔާއެއްގެ ސަބަބުން މި މެޗުގައި ޔަމާލް ކުޅެފައެއް ނުވެއެވެ. އެހެން ނަމަވެސް ބާސާ އިން މި މެޗުގައި 24 ޝޮޓެއް ފޮނުވާފައިވާއިރު، އޭގެ ތެރެއިން ގޯލާ އަމާޒުވެފައިވަނީ 10 ޝޮޓެވެ.

މެޗުގެ ފުރަތަމަ ގޯލު ފުރަތަމަ ހާފުގެ 29 މިނެޓުގައި ކާމިޔާބުކޮށްދިނީ ޒުވާން އަދި ހުނަރުވެރި ފާމިން ލޮޕޭޒްއެވެ. އެގޮތުގައި އޮވެ މެޗުގެ ފުރަތަމަ ހާފު ނިމުމު ނަމަވެސް، ބާސެލޯނާއިން ވަނީ ދެވަނަ ހާފުގައި އެ ޓީމުގެ އެންމެ މުހިންމު އެއް ކުޅުންތެރިޔާ އަދި މި އަހަރުގެ ބެލެންޑިއޯގެ ރޭސްގައި ވާދަކުރާނެ ކަމަށް ބެލެވޭ ރަފީނިއާ ކުޅެން ނެރެފައެވެ.

އެއާއެކު ބާސާގެ އެޓޭކްތައް ވަރުގަދަވިއެވެ. ނަތީއްޖާއެއްގެ ގޮތުން ދެވަނަ ހާފުގައި ބާސެލޯނާއިން ޖެހި ފުރަތަމަ ލަނޑު ޖަހައިދިނީ ވެސް ރަފީނިއާއެވެ. އޭގެ ތިން މިނެޓު ފަހުން ފާމިން ލޮޕޭޒް އިން އޭނާގެ ދެ ވަނަ ލަނޑު ކާމިޔާބުކޮށްދިން އިރު، ބާސާގެ ހަތަރުވަނަ ލަނޑު ކާމިޔާބުކޮށްދިނީ ވެސް ރަފީނިއާއެވެ. 

އޭގެ ފަހުން މެޗުގެ 68 ވަނަ މިނެޓުގައިި ކުޅެން އަރައި ތަޖުރިބާކާރު ފޯވާޑް، ރޮބަޓް ލެވަންޑޯސްކީ ވަނީ މެޗުގައި ދެ ލަނޑު ކާމިޔާބުކޮށްދީފައެވެ.

މި ނަތީއްޖާއާ އާއެކު ބާސާ ވަނީ ތާވަލުގެ ދެވަނައަށް އަރާފައެވެ. އެއްވަނައިގައި އޮތީ ދެ ޕޮއިންޓު އިތުރަށް ހޯދައިގެން ރެއަލް މެޑްރިޑްއެވެ.

ބާސެލޯނާއިން ދެން ނުކުންނާނީ އަންނަ ހުކުރު ދުވަހު، ޗެމްޕިއަންސް ލީގުގެ މެޗަށް އިނގިރޭސި ކުލަބު ނިއުކާސަލްއާ ދެކޮޅަށެވެ.