އިންޑިއާގައި އިންވެސްޓްކުރުމަށް ޔޫ.އޭ.އީގެ ޝައުގުވެރިކަން އެބަހުރި: ޕިޔުޝް ގޯޔާލް
އިންޑިއާގެ ދިފާޢީ ސިނާޢަތާއި، ޓެކްނޮލޮޖީ އަދި ޖައްވީ ސިނާޢަތަށް ޔުނައިޓެޑް އަރަބް އެމިރޭޓްސްގެ ޝައުޤުވެރިކަން އެބަހުރިކަމަށް އިންޑިއާގެ ވިޔަފާރިއާއި ސިނާޢަތާ ބެހޭ ވަޒީރު ޕިޔުޝް ގޯޔާލް ވިދާޅުވެއްޖެއެވެ.
ޔޫ.އޭ.އީއަށް ކުރެއްވި ރަސްމީ ދަތުރުފުޅަކަށްފަހު އަބޫދާބީގައި ނޫސްވެރިންނާއި ވާހަކަ ދައްކަވަމުން ޕިޔުޝް ގޯޔާލް ވިދާޅުވީ ޔޫ.އޭ.އީގައި މިހާރުވެސް ޔޫ.ޕީ.އައި ގާއިމްކުރެވިފައިވާކަމަށާއި، އިންޑިއާއާއި ޔޫ.އޭ.އާއި ދެމެދު އިތުރު ވިޔަފާރީގެ މަޝްވަރާތައް ކުރެވެމުން އަންނަކަމަށެވެ. މި ދެގައުމުގެ މެދުގައި ވިޔަފާރީގެ މަޝްވަރާތައް ހަރުދަނާކުރުމަށް ހައިލެވެލް ޖޮއިންޓް ޓާސްކްފޯސް އޮން އިންވެސްޓްމަންޓްގެ ނަމުގައި މަތީ ފަންތީގެ ޓާސްކްފޯހެއް ވަނީ އެކުލަވާލާފައެވެ.
ޕިޔުޝް ގޯޔާލް ވިދާޅުވީ އިންޑިއާގެ ބޭންކިން އިންޑަސްޓްރީއާއި އެހެނިހެން ދާއިރާތަކުގައިވެސް އިންވެސްޓްކުރުމަށް ޔޫއޭއީގެ ޝައުގުވެރިކަން އެބަހުރިކަމަށެވެ. އޭނާ ޔޫއޭއީއަށް ކުރެއްވި ދަތުރުފުޅުގައި އަރިހުގައި 75 ވިޔަފާރިވެރިންގެ ވަފުދެއްވެސް ގެންދެވިއެވެ.
ދެޤައުމުގެ ވިޔަފާރީގެ ގުޅުން ވަރުގަދަވެ، ޔޫ.އޭ.އީ އިން އަރުވާ ދެވަނައަށް އެންމެ މަތީ ޝަރަފުވެސް އިންޑިއާއިން ޔޫ.އޭ.އީއަށް ކަނޑައަޅާފައި ހުންނަވާ ސަފީރު ސަންޖޭ ސުދީރަށް ވަނީ އަރުވާފައެވެ. ސަންޖޭ ސުދީރު ޔޫ.އޭ.އީ ސަފީރަކަށް ފޮނުވުމުގެ ކުރިން ހުންނެވީ ދިވެހިރާއްޖެއަށް ކަނޑައަޅާފައި ހުންނަވާ ސަފީރުގެ ގޮތުގައެވެ.
ޕިޔުޝް ގޯޔާލް ވިދާޅުވީ ޔޫ.އޭ.އީއިން ސަންޖޭ ސުދީރަށް މި އެވޯޑް އެރުވުމުންވެސް އެނގެނީ ދެގައުމުގެ ގުޅުން ބަދަހިވަމުންދާ މިންވަރާއި، ކުރެވޭ މަސައްކަތް ކާމިޔާބުކަން ކަމަށެވެ.
Advertisement
This content is created and paid for by advertisers and does not involve Voice Journalists
