ތ. ކަނޑޫދޫގެ ނަރުދަމާ މަޝްރޫއުގެ 96 އިންސައްތަ ނިމިފައިވާ ކަމަށް ރައީސް އޮފީހަށް އަދި ކަމާ ގުޅޭ އިދާރާއަށް އެ މަސައްކަތްކުރި ކުންފުނިން އެންގި ނަމަވެސް، އަސްލު މަސައްކަތް އޮތީ މާ ފަހަތުގައިކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

އަތޮޅުތެރެއަށް ރައީސް ކުރައްވާ ދަތުރުފުޅުގެ ތެރެއިން އެ އަތޮޅު ކަނޑޫދޫއަަށް މިއަދު ރައީސް ވަނީ ވަޑައިގަންނަވައިފައެވެ. އެ ދަތުރުފުޅުގެ ތެރެއިން ރައީސް ވަނީ އެ ރަށުގެ މަޝްރޫއުތަކުގެ އަދާހަމަ ކައުންސިލާއި ވުޒާރާތަކުގެ ފަރާތުން ސާފުކުރައްވައި އެ މަސައްކަތްތައް ހިނގާ ނުހިނގާ ގޮތް ބައްލަވައިލައްވައިފައެވެ. 

އެގޮތުން އެ ރަށުގެ މަޝްރޫއުތަކުގެ ވާހަކަ ހިއްސާކުރައްވަމުން ރައީސް ވިދާޅުވީ، މިވެރިކަން އައިއިރު ސަރުކާރާ ހަވާލުވީ ހުއްޓިފައި ހުރި މަޝްރޫއުތަކަކާއި އަލަށް ފަށާ މަޝްރޫއުތަކެއް ކަމަށެވެ. އަދި އޭގެ ތެރެއިން ހުއްޓިފައި ހުރީ އެންމެ އުނދަގޫ އެއް މަޝްރޫކަމުގައިވާ ނަރުދަމާ މަޝްރޫއުގެ ވާހަކަތައް ހިއްސާކުރައްވަމުން ރައީސް ވިދާޅުވީ، އެ ރަށުގެ ނަރުދަމާގެ މަސައްކަތްކުރަމުން އައި ބޭރުގެ ކުންފުނިން ރާއްޖޭގެ އެހެން ވަރަށް ގިނަ ރަށްތަކުގައި ވެސް އެ މަސައްކަތްކުރަމުން އައި ކަމަށެވެ. 

އެހެން ނަމަވެސް ފައިސާ ނުދިނުން ފަދަ އެކި ސަބަބުތަކާއި ހެދި އެ މަސައްކަތް ހުއްޓިފައިވާކަން ފާހަގަކުރެވިފައިވާ ކަމަށް ރައީސް ވިދާޅުވިއެވެ.

އެއާއެކު ރައީސް ވަނީ އެ ދަތުރުފުޅުގެ ތެރެއިން އެ ރަށުގެ ނަރުދަމާގެ މަޝްރޫއިން ފާހަގަކުރެވުނު މުހިންމު ކަމެއް ވެސް ހިއްސާކުރައްވާފައެވެ. އެގޮތުން ރައީސް ވިދާޅުވީ، އެ ރަށުގެ ނަރުދަމާ މަޝްރޫއުގެ 96 އިންސައްތަ ނިމިފައިވާ ކަމަށް ރައީސް އޮފީހަށް އަދި ކަމާ ގުޅޭ އިދާރާއަށް އެ މަސައްކަތްކުރި ކުންފުނިން އެންގި ނަމަވެސް، އެ ރަށަށް ވަޑައިގެން ބެލި ބެލުމުން އެނގުނު ގޮތުގައި އެ މަސައްކަތް އޮތީ އެއަސް ވުރެ މާ ފަހަތުގައެވެ.

އަދި އެކަން ވަރަށް ސީރިއަސްކަމެއްގެ ގޮތުގައި ބައްލަވާނެ ކަމަށް ރައީސް ވިދާޅުވިއެވެ.

އެހެން ނަމަަވެސް އެ ކަމާމެދު ވަރަށް އަވަހަށް ގޮތެއް ނިންމައި އެކަން ވަރަށް އަވަހަށް ޙައްލުކޮށްދެއްވާނެ ކަމުގެ ޔަގީންކަން ރައީސް ވަނީ އެ ރަށުގެ ރައްޔިތުންނަށް ދެއްވާފައެވެ. އެގޮތުން އެ މަސައްކަތް އެކުންފުނި ލައްވައި ކުރުވާނީތޯ ނުވަތަ ބާކީ މަސައްކަތް އެމްޑަބްލިއުއެސްސީއާ ހަވާލުކޮށްގެން ކުރިޔަށްގެންދިޔުމާ މެދު ވަރަށް އަވަހަށް ގޮތެއް ނިންމަވާނެ ކަމަށް ރައީސް ވިދާޅުވިއެވެ.

ކަނޑޫދޫގެ ނަރުދަމާގެ މަސައްކަތަކީ 2019 ވަނަ އަހަރު އޭރުގެ ޕްލޭނިން މިނިސްޓްރީން ހަވާލުކުރި މަޝްރޫއެކެވެ. 2021 ވަނަ އަހަރަށް ނިންމަން ތާވަލުކުރި އެ މަޝްރޫއަށް ސަރުކާރުން 19 މިލިއަން ރުފިޔާ ޚަރަދުކުރާއިރު، މިހާތަނަށް ވެސް އެ މަޝްރޫއު ނިމިފައެއް ނުވެއެވެ.

އެކަމުގެ ކަންބޮޑުވުން އެރަށު ރައްޔިތުންނާއި ކައުންސިލުން ވަނީ މީގެ ކުރިން ކަންބޮޑުވުން ވެސް ފާޅުކޮށްފައެވެ.

ކަނޑޫދޫގެ ނަރުދަމާ މަޝްރޫއުގެ ތެރެއިން ރަށުގައި ފެނާއި ނަރުދަމާގެ ވިއުގަ އެޅުމާއި، ނަރުދަމާގެ ޕަމްޕް ސްޓޭޝަން ގާއިމުކުރުމަށް ވަނީ ހަމަޖެހިފައެވެ.

އަދި އާރްއޯ ޕްލާންޓާއި ސްޓޯރޭޖް ޓޭންކް ބަހައްޓައި، ސީ އައުޓް ފޯލް އެޅުމާއި، އިދާރީ އޮފީސް ޤާއިމުކުރުން ހިމެނެއެވެ. އަދި ގޭގެއަށް ފެނާއި ނަރުދަމާގެ ކަނެކްޝަން ގުޅައިދިނުން ވެސް މި މަސައްކަތުގެ ތެރޭގައި ހިމެނެއެވެ