ނިއުކާސަލް އިން ރިކޯޑު އަގެއްގައި ބަދަލުވި އެލެކްސަންޑާ އިސާކް ލިވާޕޫލަށް ކާމިޔާބުކޮށްދިން ފުރަތަމަ ލަނޑާއެކު  އިނގިރޭސި ލީގް ކަޕްގެ ތިންވަނަ ބުރުން ލިވާޕޫލް މޮޅުވެއްޖެއެވެ.

ލިވާޕޫލުގެ އެންފީލްޑްގައި ރޭ ކުޅުނު މި މެޗުން ސައުތަމްޕްޓަންއާ ދެކޮޅަށް ކުޅެ ލިވާޕޫލް މޮޅުވީ 1-2 ލަނޑުންނެވެ. އެގޮތުން އެ މެޗުގައި އެންމެ ފުރަތަމަ ލަނޑު ޖެހީ ވެސް ލިވަޕޫލް އިންނެވެ.

މެޗުގެ 43 ވަނަ މިނެޓުގައި ސައުތަމްޕްޓަންގެ ގޯލްކީޕަރުގެ އަތުން ހެދުނު ކުށެއްގެ ފައިދާ ނަގައި ފެޑެރިކޯ ކިއެސާގެ ޕާހަކުން އިސާކް ވަނީ ގޯލު ޖަހާފައެވެ. މިއީ ގާތްގަޑަކަށް 125 މިލިއަން ޔޫރޯގެ ރިކޯޑު ފީއެއްގައި ލިވަޕޫލާ ގުޅުނު ފަހުން އިސާކް އެ ޓީމަށް ކާމިޔާބުކޮށްދިން ފުރަތަމަ ލަނޑެެވެ.

މެޗުގެ ދެވަނަ ހާފުގައި ސައުތަމްޕްޓަން ވަނީ ވަރަށް މޮޅަށް ބޯޅަ ހިފަހައްޓައިގެން ކުޅެފައެވެ. އޭގެ ނަތީއްޖާއެއްގެ ގޮތުން ލިވަޕޫލްގެ ވަޓަރޫ އެންޑޯގެ އަތުން ހެދުނު ގޯހެއްގެ ފައިދާނަގައި، ސައުތަމްޕްޓަންގެ ޝިއާ ޗާލްސް ވަނީ 76 ވަނަ މިނެޓްގައި މެޗުގެ ނަތީއްޖާ ހަމަހަމަކޮށްދީފައެވެ.

މެޗުން ލިވަޕޫލް މޮޅުވި ގޯލު ކާމިޔާބުކޮށްދިނީ ބަދަލުކުޅުންތެރިއެއްގެ ގޮތުގައި ކުޅެން ނިކުތް ހިއުގޯ އެކިޓިކޭއެވެ. އެ ގޯލަށް ފަހު ޖޯޒީ ބާލައި އެކެޓިކޯ އުފާފާޅުކުރުމުން ރެފެރީ ވަނީ އޭނާއަށް ދެވެނަ ރީނދޫކާޑާއެކު ރަތްކާޑު ދައްކައި ދަނޑުން ފޮނުވާލާފައެވެ.

މެޗަށް ފަހު ލިވަޕޫލުގެ ކޯޗު އާނެ ސްލޮޓް ވަނީ އެކެޓިކޭ ހޯދި ރަތްކާޑާއި މެދު ހިތްހަމަނުޖެހި ވާހަކަދައްކާފައެވެ. އެގޮތުން އެއީ ހޯދި ބޭކާރު ކާޑެއްގެ ކަމަށް ކޯޗު ވަނީ ބުނެފައެވެ. އެ ރަތް ކާޑާ ގުޅިގެން އެކިޓިކެ ވަނީ އެއް މެޗަށް ސަސްޕެންޑް ވެފައެވެ.