ދިރާގު ދިވެހި ޕްރިމިއަރ ލީގުގެ މި ސީޒަނުގެ ދެވަނަ މެޗުން ވެސް މަޒިޔާ ސްޕޯޓްސް އެންޑް ރެކްރިއޭޝަން ކުލަބު މޮޅުވެއްޖެއެވެ.

ރޭ ގަލޮޅު ރަސްމީ ދަނޑުގައި ކުޅުނު މެޗުގައި މާޒިޔާ މޮޅުވީ ޓީސީ ސްޕޯޓްސް ކްލަބުގެ އަތުން 3-0 ގެ ނަތީޖާއިންނެވެ.

މެޗްގެ ވަރަށް ކުރީކޮޅު މަޒިޔާގެ ސްޕެނިޝް ސްޓްރައިކަރު ސަރޖިއޯ މެންދިގުޗިއާ ވަނީ ފުރަތަމަ ލަނޑު ޖަހާފައެވެ. މި ލަނޑު ޖެހުމުގައި އެހީތެރިވެދިނީ ހަމްޒާ މުހައްމަދު (ހަމްޕު) އެވެ. ހަމްޕު ވަނީ މެޗުގައި ގިނަ ވަރަށް މޮޅަށް ކުޅެފައެވެ. އޭގެ ނަތީއްޖާއެއްގެ ގޮތުން މެޗުގެ 43 ވަނަ މިނެޓުގައި ހަސަން ނާޒިމް (ޗޯޓު) ދެވަނަ ލަނޑު ޖެހިއިރު ވެސް، އެ ލަނޑު ވެސް އައީ ހަމްޕު ތަނަވަސްކޮށްދިން ފުރުސަތަކުންނެވެ.

މެޗުގެ 87 ވަނަ މިނެޓުގައި 17 އަހަރުގެ އިލާން ވަނީ އަނުފް އަބްދުﷲގެ ހުރަހަކުން ބޮލުން ޖަހައި ތިންވަނަ ލަނޑު ޖަހާފައެވެ. 

މަޒިޔާއިން ވަނީ މި ސީޒަނުގެ ފުރަތަމަ މެޗުގައި އީގަލްސް އާ ދެކޮޅަށް ކުޅެ 5-1 އިން މޮޅުވެފައެވެ. ޓީސީ ވަނީ އެ ޓީމުގެ ފުރަތަމަ މެޗުގައި ނިއު ރޭޑިއަންޓާ ދެކޮޅަށް ކުޅެ 6-0 އިން ބަލިވެފައިވެއެވެ.