މިދިޔަ އަހަރުގެ ބެލޮންޑިއޯއިން ދެވަނަ ހޯދި އެންމެ 18 އަހަރުގެ ލަމީން ޔަމާލުގެ ޖާދުވީ ހުރަހަކުން ޖެހި ގޯލާއެކު، ބާސެލޯނާއިން ސްޕެނިޝް ލަލީގާގެ އެއްވަނައަށް ޖެހިލައިފިއެވެ.

ރޭ ރެއާލް ސޮސިއެޑާޑްއާ ދެކޮޅަށް ބާސެލޯނާގެ ވަގުތީ ދަނޑުކަމުގައިވާ އޮލިމްޕިކް ސްޓޭޑިއަމްގައި ކުޅުނު އެ މެޗުން ބާސެލޯނާ މޮޅުވީ ފަހަތުން އަރައި 1-2 އެވެ. 

މެޗުގެ 30 ވަނަ މިނިޓުގައި އަލްވަރޯ އޮޑްރިއޯޒޯލާ ލަނޑެއް ޖަހައި ސޮސިއެޑާޑުން ކުރި ހޯދިއެވެ. ނަމަވެސް ފުރަތަމަ ހާފު ނިމުމުގެ ކުރިން ބާސެލޯނާއިން ވަނީ މެޗު އެއްވަރުކޮށްފައެވެ. އެ ލަނޑު ޖަހައިފައިވަނީ އިނގިރޭސި ފޯވާޑް މާކަސް ރެޝްފޯޑް ނެގި ކޯނަރަކުން ޖޫލްސް ކުންޑޭ ބޮލުން ޖަހައިގެންނެވެ.

ދެވަނަ ހާފުގެ 60 ވަނަ މިނެޓުގައި އަނިޔާއަށް ފަހު އެނބުރި އައި ޒުވާން ތަރި ލަމީން ޔަމާލް ކުޅެން އަރައި ވަރަށް މޮޅަށް ކުޅުނެވެ. އެގޮތުން އޭނާ މެޗަށް އެރިތާ މިނުޓެއް ނުވަނީސް ދިން ރީތި ބޯޅައަކުން ރޮބަޓް ލެވަންޑޯސްކީ ބޮލުން ޖެހައި ބާސެލޯނާއަށް ދެވަނަ ލަނޑު ޖަހައިދިނެވެ. 

މެޗުގެ ގިނަ ވަގުތު ބޯޅަ ކޮންޓްރޯލްކޮށް ގިނަ ހަމަލާތަކެއް އުފެއްދީ ބާސެލޯނާއިން ނަމަވެސް، ސޮސިއެޑާޑްގެ ފަރާތުން ނުރައްކާތެރި ހަމަލާތަކެއް ފެނިގެން ދިޔައެވެ. މެޗުގެ ފަހުކޮޅު މިކެލް އޮޔާޒަބާލް އާއި ޓަކެފޫސާ ކޫބޯ ފޮނުވާލި ހަމަލާތައް ގޯލްކީޕަރު ވޮއިޗެކް ޝްޗެސްނީ މޮޅަށް ހުއްޓުވައި، ބާސެލޯނާއަށް ލީޑު ދަމަހައްޓައިދިނެވެ.

މި މޮޅާއެކު ބާސެލޯނާ ވަނީ ލަލީގާ ތާވަލުގެ އެއްވަނަ ރެއާލް މެޑްރިޑާ ވުރެ އެއް ޕޮއިންޓުގެ ކުރި ހޯދާފައެވެ. މެޗަށް ފަހު ބާސެލޯނާގެ ކޯޗު ހަންސީ ފްލިކް ވަނީ ޕެޑްރީ އާއި ޔަމާލަށް ވަރަށް ބޮޑަށް ތައުރީފުކޮށްފައެވެ.

ކުރިޔަށް ބާސެލޯނާއަށް އޮތީ ޗެމްޕިއަންސް ލީގުގައި މިދިޔަ އަަހަރުގެ ޗެމްޕިއަނުންކަމުގައިވާ ޕީއެސްޖީއާ ދެކޮޅަށް ނުކުންނަ މެޗެވެ. މުހިންމު ދެ ކުޅުންތެރިން ކަމުގައިވާ ރަފީނީއާ އަދި ކީޕަރު ޖޯއަން ގާސިއާ އަށް އެ މެޗުގައި އަނިޔާގެ ސަބަބުން ނުކުޅެވޭނެކަން މިހާރު ވަނީ ޔަގީންވެފައެވެ.