ފަސް އަހަރުގެ މެދުކެނޑުމަކަށްފަހު މިމަހުގެ 26 ވަނަ ދުވަހު އިންޑިއާއި ޗައިނާއާ ދެމެދު ސީދާ ވައިގެ ދަތުރުފަތުރު ފަށާނެކަމަށް އިންޑިއާގެ އެންމެ ބޮޑު އެއަރލައިން އިންޑިގޯއިން ބުނެފިއެވެ.

2020 ވަނަ އަހަރު ސަރަހައްދީ އިމުގައި ހިނގި ކުރިމަތިލުންތަކާއި ގުޅިގެން ދެގައުމުގެ މެދުގައި ސީދާ ވައިގެ ދަތުރުތައް މެދުކަނޑާލުމަށްފަހު، އަލުން ދަތުރުތައް ފެށުމުގެ ދެގައުމުގެ ސަރުކާރުން މިދިޔަ އަހަރުން ފެށިގެން އަންނަނީ މަސައްކަތްކުރަމުންނެވެ. އެގޮތުން މީގެ މަހެއްހާ ދުވަސްކުރިން އިންޑިއާގެ ބޮޑުވަޒީރު ނަރެންދްރަ މޯދީ އެސް.ސީ.އޯ ގައުމުތަކުގެ ވެރިންގެ ބައްދަލުވުމަށް ޗައިނާއަށް ކުރެއްވި ދަތުރުފުޅުގައި، ޗައިނާގެ ރައީސް ޝީ ޖިންގްޕިންގް އާއެކު ބޭއްވި ބައްދަލުވުމުގައިވެސް ވައިގެ ދަތުރުތައް އަލުން ފެށުމާގުޅޭ ގޮތުން މަޝްވަރާކުރެއްވިއެވެ.

އިންޑިގޯއިން މިމަހުގެ 26 ވަނަ ދުވަހުން ފެށިގެން ކޮންމެ ދުވަހަކު ކަލްކަތާއާއި ޗައިނާގެ ގުއަންޖޯ އާއި ދެމެދު ދުވާލު އެއް ފްލައިޓް ބާއްވަން ފަށާނެއެވެ. އިންޑިއާގެ ސިޓީތަކަށް އަލުން ވައިގެ ދަތުރުތައް ފެށުމާއި ގުޅިގެން ގުއަންޖޯ ބައިޔުން އެއަރޕޯޓުން ނެރުނު ބަޔާނެއްގައި ބުނީ ކުރިއަށް އޮތްތަނުގައި ދިއްލީއަށްވެސް ސީދާ ވައިގެ ދަތުރުތައް ފެށުމަށް އުއްމީދުކުރާކަމަށެވެ.