މިދިޔަ ސަރުކާރުން ފެށި ގެދޮރުވެރިޔާގެ 4،000 ގެ ފްލެޓްތަކުގެ ތެރެއިން 1،200 އަށް ވުރެ ގިނަ ފްލެޓަށް ސެކިއުރިޓީ ޑެޕޮސިޓް ދައްކައިފައިވާ ކަމަށް ފަހި ދިރިއުޅުން ކޯޕަރޭޝަން (އެފްޑީސީ) އިން ބުނެފިއެވެ.

އެފްޑީސީން ބުނި ގޮތުގައި މިދިޔަ މަހުގެ ހަތް ވަނަ ދުވަހުން ފެށިގެން ގެދޮރުވެރިޔާގެ ފްލެޓްތަކަށް ސެކިއުރިޓީ ޑެޕޮސިޓް ދައްކަން ހުޅުވާލިފަހުން މިހާތަނަށް 1،731 މީހަކަށް އެ ފައިސާ ދައްކަން ވަނީ އަންގާފައެވެ. އޭގެ ތެރެއިން މިހާތަނަށް 1،273 މީހަަކު އެ ފައިސާ ދައްކައިފައިވާ ކަމަށް އެކުންފުނިން މައުލޫމާތުދެއެވެ.

އަދި މިހާތަނަށް އެ ފްލެޓްތަކުގެ އެއްބަސްވުންތަކުގައި 3،140 މީހަކު ސޮއިކޮށްފައިވާ ކަމަށް ވެސް އެފްޑީސީން ބުންޏެވެ. ފްލެޓްތަކުގެ އެއްބަސްވުމުގައި ސޮއިކޮށް، ސެކިއުރިޓީ ޑިޕޮސިޓް ދައްކަން އަންގަމުން އަންނަނީ ފްލެޓްތައް ނިމިފައިވާ ތަރުތީބުންކަމަށް ވާއިރު، މިހާރު ބައެއް ފްލެޓްތަކުގައި ދިިރިއިރުޅުމަށް މީހުންނަށް ތަޅުދަނޑިތައް ވެސް ވަނީ ހަވާލުކޮށްފައެވެ.

ގެދޮރުވެރިޔާގެ ދަށުން ޢިމާރަތްކުރަމުން އަންނަ ފްލެޓްތައް ޢިމާރަތްކުރަނީ އިންޑިޔާގެ ދެ ކުންފުންޏަކުންނެވެ. އެ ފްލެޓްތަކުގައި ދެ ކޮޓަރީގެ އެޕާޓްމެންޓްތަކާއި ތިން ކޮޓަރީގެ އެޕާޓްމެންޓުތައް ހުންނައިރު، ދެ ކޮޓަރީގެ އެޕާޓްމަންޓުތައް ދޫކުރަނީ 7،000 ރުފިޔާއަށެވެ. އެ ތަންތަނުގެ މެއިންޓެނަންސް ފީގެ ގޮތުގައި 1،000 ރުފިޔާ ނަގާއިރު، ސެކިއުރިޓީ ޑިޕޮސިޓުގެ ގޮތުގައި ދައްކަން 15،000ރ. ދައްކަން ޖެހެއެވެ.

އަދި ތިން ކޮޓަރީގެ އެޕާޓްމެންޓުތައް 9،500 ރުފިޔާއަށް ދޫކުރާއިރު، މެއިންޓެނެންސް ފީގެ ގޮތުގައި 1،5000 ރުފިޔާ އަދި ސެކިއުރޓީ ޑެޕޮސިޓްގެ ގޮތުގައި 25،000 ރުފިޔާ ދައްކަން ޖެހެއެވެ.