ކ. ގުޅީ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއުގެ 88 އިންސައްތަ ނިމިފައިވާ ކަމަށް އެމްޓީސީސީން ބުނެފިއެެވެ. 

އެމްޓީސީސީން ބުނީ ގުޅީގެ އެ މަޝްރޫއުގެ ތެރެއިން ޖިއޯ ބޭގް ރިވެޓްމަންޓް ޖެހުމުގެ މަސައްކަތުގެ 94 އިންސައްތަ މަސައްކަތް ނިމިފައިވާ ކަމަށެވެ. އަދި މުޅި މަސައްކަތުގެ ޖުމްލަ 88 އިންސައްތަ މަސައްކަތް ނިމިފައިވާ ކަމަށް އެމްޓީސީސީން ބުންޏެވެ.

ގުޅީ ބިން ހިއްކުމުގެ މަޝްރޫއުގެ ދަށުން އެ ރަށުން 10.15 ހެކްޓަރުގެ ބިން ހިއްކުމަށް ހަމަޖެހިފައިވާއިރު، އެ ބިމުގައި 940 މީޓަރުގެ ހިލަ ރިވެޓްމަންޓް ޖެހުމާއި 362 މީޓަރުގެ ޖީއޯބޭގް ރިވެޓްމަންޓް ޖެހުން ކުރިއަށްދާނެއެވެ.

ގުޅީ ބިންހިއްކުމުގެ ތެރެއިން.. ފޮޓޯ: އެމްޓީސީސީ

އަދި 88 މީޓަރުގެ ގޮރޮއިން ޖެހުމުގެ މަސައްކަތް ވެސް އެ މަޝްރޫއުގެ ތެރޭގައި ހިމެނެއެވެ.

89.63 މިލިއަން ރުފިޔާގެ އެ މަޝްރޫއުގެ ޢަމަލީ މަސައްކަތް ފަށައިފައިވަނީ މި އަހަރުގެ އޭޕްރީލް މަހުގެ ތެރޭގައެވެ. މި މަޝްރޫއާއެކު 814 މީހުންގެ އާބާދީއެއް އޮންނަ ގުޅީގެ ބިން ދެގުނަ ބޮޑުވާނެއެވެ. ފަތުރުވެރިކަން ކުރިއަރަމުން އަންނަ އެ ރަށުގައި މި ވަގުތު ވެސް 15 ވަރަކަށް ގެސްޓްހައުސް ހިންގައެވެ.