ކުރިއަށް ނުދާ ނަރުދަމާގެ އެއްބަސްވުންތައް ބާތިލުކުރަން ނިންމާފައިވާ ކަަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ އދ އަތޮޅުގެ މީހުން ދިރިއުޅޭ 10 ރަށަށް މިއަދު ފެއްޓެވި ދަތުރުފުޅުގައި ފެންފުއްޓަށް ވަޑައިގެން ވާހަކަފުޅު ދައްކަވަމުންނެވެ. ފެންފުށީގެ ނަރުދަމާ މަޝްރޫއު ހުއްޓިފައި އޮތުމަކީ އެ ރަށުގެ ރައްޔިތުންގެ ވަރަށް ބޮޑު ކަންބޮޑުވުމެެކެވެ.
އެކަމަށް އިޝާރާތް ކުރައްވާ ރައީސް ވިދާޅުވީ ފެންފުށީގެ ނަރުދަމާގެ މަސައްކަތް ހަވާލުކޮށްފައި ވަނީ އަމިއްލަ ކުންފުންޏަކަށް ކަމަށާ އެފަދަ އިން އަމިއްލަ ކުންފުނިތަކަށް ނަރުދަމާ އަޅަން ހަވާލުކޮށްފައިވާ ވަރަށް ގިނަ ރަށްރަށުގައި މަޝްރޫއު ކުރިއަށް ނުދާތީ ރައްޔިތުންގެ ކަންބޮޑުވުން އެބަ އޮތް ކަމަށެވެ.
ނިމިދިޔަ ރައީސް ސޯލިހްގެ ސަރުކާރުން ވަނީ ރާއްޖޭގެ ހުރިހާ ރަށެއްގައި ފެނާއި ނަރުދަމާ އަޅަން އެކި ކުންފުނިތަކަށް ހަވާލުކޮށްފަ އެވެ. އެ މަޝްރޫއުތައް ކުރިއަށް ނުގޮސް ގިނަ ދުވަސްތަކެއް ވަންދެން ހުއްޓިފައި އޮތުމަކީ ރައްޔިތުންގެ ކަންބޮޑުވުމެކެވެ. މި ސަރުކާރުން ބުނާ ގޮތުން އެ މަޝްރޫއުތައް ފެށީ އެކަށީގެންވާ އެއްވެސް ޕްލޭނެއް ނެތި އެވެ. ކުރީ ސަރުކާރުން ބުނާ ގޮތުން މަޝްރޫއުތައް ހުއްޓުނީ މި ސަރުކާރު އައި ފަހުންނެވެ.
ރައީސް ފެންފުށީގައި ވާހަކަފުޅު ދައްކަވަނީ -- ފޮޓޯ: ރައީސް އޮފީސް
ރައީސް މިއަދު ވިދާޅުވީ ނަރުދަމާގެ މަޝްރޫއުތަކަށް ބަރާބަރަށް ވަނީ ފައިސާ ދޫކޮށްފަ އެވެ. އަދި ސަރުކާރުން ބާރު އަޅައިގެން ވެސް ބައެއް ރަށްރަށުގައި އެ މަޝްރޫއުތައް އަލުން ނުފެށުނެވެ. އެހެން ކަމުން އެފަދަ އެއްބަސްވުންތައް ބާތިލު ކުރައްވާނެ ކަމަށް ވިދާޅުވި އެވެ.
"އަޅުގަނޑުމެން މިހާރު ނިންމާފައި މި އޮތީ ޓާމިނޭޝަނަަކަށް ދާގޮތަށް. ޓާމިނޭޓް ކޮށްގެން ވިޔަސް މިކަން ކުރަން. ވަކި ބަޔަކާ ހަވާލުކޮށްގެން ވެސް [ނަރުދަމާގެ މަސައްކަތް] ކުރާގޮތަށް. އެހެންވީމަ މިއީ ވަރަށް ލަސްވާ ކަމެއް," ނަރުދަމާގެ މަޝްރޫއުތައް ލަސްވާ ސަބަބު ސާފުކޮށް ދެއްވާ ރައީސް ވިދާޅުވި އެވެ.
ރައީސް ވިދާޅުވީ ރައްޔިތުންނަށް ބޭނުންވާ ކަންކަން މިހެން ލަސްވުމަށް ފުރުސަތު ނުދެއްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
